ابايدىڭ «جيدەباي-بٶرٸلٸ» مەملەكەتتٸك تاريحي-مەدەني جەنە ەدەبي مەموريالدىق قورىق-مۋزەيٸ مۇراعاتىندا جيناقتالعان گازەت-جۋرنال تٸگٸندٸلەرٸن اقتارۋ ٷستٸندە ۇلى اقىن مۇقاعاليدىڭ «دالا دانىشپانى» دەگەن ٶلەڭٸ كٶزگە وتتاي باسىلدى! بٸزدٸڭ بٸلۋٸمٸزشە, بۇل ٶلەڭ مۇقاعاليدىڭ جىر جيناقتارىندا بۇرىن-سوڭدى جارييالانباعان.
سوندىقتان قازاقتىڭ XIX عاسىردا ٶمٸر سٷرگەن ۇلى اقىنىنا ارنالعان XX عاسىردا عۇمىر كەشكەن تاعى بٸر ۇلى اقىنىنىڭ ەرەكشە قۇرمەت پەن ماقتانىش سەزٸمٸ تۇنعان ٶلەڭٸن جارييالاۋعا اسىقتىق.
دالا دانىشپانى
دالا جاتىر – ٶن بويى تۇنعان ٶلەڭ,
اباي, مٸنە, جاپاندا تۇرعان ەمەن.
اتا سٶزٸ تەربەتكەن بەسٸگٸمدٸ,
اتا سٶزٸن ٶمٸردە تىڭداپ ٶلەم.
...ۇلى ەمەس اباي جالعىز ساحارانىڭ,
(مەن ەمەس, سولاي دەگەن اتالارىم).
سول ۇراندى ۇرپاققا اپارامىن,
مەن قازاق – اباي بولىپ اتانامىن.
ۋھ, دالا!
دالا تولعان كٶل-كٶسٸر جىر,
دالا – قوبىز تۇتپايدى پەرنەسٸن كٸر.
تٸرٸ ابايدى ەلديلە, دارحان دالام,
ٶلەڭ سەلٸ ٶڭٸردٸ تەربەسٸن بٸر.
دالا, دالا...
سال – دالا سەلەۋلەگەن,
جىرمەن ۇيىقتاپ, ويانعان ٶلەڭمەنەن.
دالا دەگەن – كٷي ساندىق بۇل قازاققا,
اباي دەسە قۇلاعى ەلەڭدەگەن.
جىلدار, جىلدار...
قانشاما الىستادىق,
قانشاما ٶزەن ٶزگەرتتٸ اعىستارىن.
ۋاقىت وزدى, سەن بٸراق قالىسپادىڭ,
ۋا, ارمىسىڭ, ارىسىم, دانىشپانىم!
مۇقاعالي ماقاتاەۆ.
"قازاق ەدەبيەتٸ", 13 تامىز, 1965ج.
ابايدىڭ «جيدەباي-بٶرٸلٸ» مەملەكەتتٸك
قورىق-مۋزەيٸنٸڭ باسپاسٶز قىزمەتٸ
