Rejisser Bolat Qalymbetovtiń «Muqaǵali» kórkem filminiń kórsetilimi pandemiiaǵa bailanysty keiinge qaldyryldy, dep habarlaidy "Ult aqparat" Sh. Aimanov atyndaǵy «Qazaqfilm» kinostýdiiasyna silteme jasap.
«Búgin qazaqtyń aqiyq aqyny Muqaǵali Maqataevtyń týǵanyna - 90 jyl. Belgili rejisser Bolat Qalymbetovtiń filmine onyń qily taǵdyry men maǵynaly ǵumyry negiz boldy. Nebári 45 jyl ǵumyrynda ólmes óleń jazyp, óshpes iz qaldyrǵan aqyn tirisinde laiyqty baǵasyn almady. Alaida ómirin shyǵarmashylyqqa arnaǵan aqyn eshqashan moiyǵan emes.
«Qazaqfilm» kinostýdiiasy túsirgen «Muqaǵali» filminiń tusaýkeseri pandemiiaǵa bailanysty keiinge shegerilýde, biraq osy kúzde kórermender bul filmdi úlken ekranda kóredi dep úmittenemiz», - dep jazylǵan kinostýdiianyń Facebook paraqshasynda.
Eske sala keteiik, filmniń túsirilim jumystary ótken jyldyń maýsym aiynda bastalǵan. Negizgi epizodtar Almaty oblysy men Almaty, Óskemen qalalarynda jáne Sankt-Peterbýrgte túsirildi. Kartinaǵa aqyn ómiriniń sońǵy jyldary arqaý bolǵan.
Muqaǵali Maqataev – qazaqtyń lirik aqyny. Az ǵumyrynda birneshe lirikalyq jyr jinaǵy men dastandary jaryq kórgen. Aýdarma salasynda Shekspirdiń sonetterin, Danteniń «Qudiretti komediiasyn» qazaqshalady. Aqynnyń «Sarjailaý», «Sónbeidi áje, shyraǵyń», «Kel, erkem, Alataýyńa» óleńderine sazger Nurǵisa Tilendiev án shyǵarǵan.
Muqaǵali Maqataev 1931 jyly 9 aqpanda Almaty oblysy qazirgi Raiymbek aýdanynyń Qarasaz aýylynda dúniege kelip, 1976 jyldyń 27 naýryzynda Almatyda dúnieden ótken.
