رەجيسسەر بولات قالىمبەتوۆتٸڭ «مۇقاعالي» كٶركەم فيلمٸنٸڭ كٶرسەتٸلٸمٸ پاندەميياعا بايلانىستى كەيٸنگە قالدىرىلدى, دەپ حابارلايدى "ۇلت اقپارات" ش. ايمانوۆ اتىنداعى «قازاقفيلم» كينوستۋديياسىنا سٸلتەمە جاساپ.
«بٷگٸن قازاقتىڭ اقيىق اقىنى مۇقاعالي ماقاتاەۆتىڭ تۋعانىنا - 90 جىل. بەلگٸلٸ رەجيسسەر بولات قالىمبەتوۆتٸڭ فيلمٸنە ونىڭ قيلى تاعدىرى مەن ماعىنالى عۇمىرى نەگٸز بولدى. نەبەرٸ 45 جىل عۇمىرىندا ٶلمەس ٶلەڭ جازىپ, ٶشپەس ٸز قالدىرعان اقىن تٸرٸسٸندە لايىقتى باعاسىن المادى. الايدا ٶمٸرٸن شىعارماشىلىققا ارناعان اقىن ەشقاشان مويىعان ەمەس.
«قازاقفيلم» كينوستۋديياسى تٷسٸرگەن «مۇقاعالي» فيلمٸنٸڭ تۇساۋكەسەرٸ پاندەميياعا بايلانىستى كەيٸنگە شەگەرٸلۋدە, بٸراق وسى كٷزدە كٶرەرمەندەر بۇل فيلمدٸ ٷلكەن ەكراندا كٶرەدٸ دەپ ٷمٸتتەنەمٸز», - دەپ جازىلعان كينوستۋدييانىڭ Facebook پاراقشاسىندا.
ەسكە سالا كەتەيٸك, فيلمنٸڭ تٷسٸرٸلٸم جۇمىستارى ٶتكەن جىلدىڭ ماۋسىم ايىندا باستالعان. نەگٸزگٸ ەپيزودتار الماتى وبلىسى مەن الماتى, ٶسكەمەن قالالارىندا جەنە سانكت-پەتەربۋرگتە تٷسٸرٸلدٸ. كارتيناعا اقىن ٶمٸرٸنٸڭ سوڭعى جىلدارى ارقاۋ بولعان.
مۇقاعالي ماقاتاەۆ – قازاقتىڭ ليريك اقىنى. از عۇمىرىندا بٸرنەشە ليريكالىق جىر جيناعى مەن داستاندارى جارىق كٶرگەن. اۋدارما سالاسىندا شەكسپيردٸڭ سونەتتەرٸن, دانتەنٸڭ «قۇدٸرەتتٸ كومەديياسىن» قازاقشالادى. اقىننىڭ «سارجايلاۋ», «سٶنبەيدٸ ەجە, شىراعىڭ», «كەل, ەركەم, الاتاۋىڭا» ٶلەڭدەرٸنە سازگەر نۇرعيسا تٸلەنديەۆ ەن شىعارعان.
مۇقاعالي ماقاتاەۆ 1931 جىلى 9 اقپاندا الماتى وبلىسى قازٸرگٸ رايىمبەك اۋدانىنىڭ قاراساز اۋىلىندا دٷنيەگە كەلٸپ, 1976 جىلدىڭ 27 ناۋرىزىندا الماتىدا دٷنيەدەن ٶتكەن.
