Elimizde múgedek balalarǵa beriletin áleýmettik járdemaqy kólemi artýy múmkin. Bul týraly Eńbek jáne halyqty áleýmettik qorǵaý vitse- ministri Erlan Áýkenov málim etti, dep habarlaidy QazAqparat.
«Azamattardyń jekelelegen sanattaryn áleýmettik turǵyda qoldaýǵa baǵyttalǵan zańǵa ózgerister men tolyqtyrýlar engizý týraly zań jobasy ázirlendi. Qujat Parlament Májilisine taiaýda engiziledi. Atalǵan jobaǵa sáikes, 7-16 jas aralyǵyndaǵy múgedek balalardy halyqaralyq kvalifikatsiiaǵa sáikes, ómir súrýine qiyn keltiretin shekteýlerge bailanysty dárejege bólý qarastyrylǵan. Bul usynysty zańǵa engizý bastamasyn QR Bala quqyqtary jónindegi ýákil Arýjan Sain kótergen bolatyn. Sonymen qatar, belgilengen úsh sanattyń bárine beriletin járdemaqynyń kólemin arttyrýdy kózdep otyrmyz», - dedi Erlan Áýkenov «Balalyq shaqty qorǵaý júiesiniń tiimdiligi jáne balanyń ál-aýqaty: memleket pen azamattyq qoǵamnyń birigýi» taqyrybyndaǵy baspasóz máslihatynda.
QR Eńbek jáne halyqty áleýmettik qorǵaý vitse-ministri bul turǵyda naqty qandai ózgerister engizilgeli jatqanyn aityp ótti.
«Suraq mynadan týyndaidy: máselen eki bólek otbasynyń 8 jastaǵy múmkindigi shekteýli eki balasy bar delik. Olardyń bireýi mektepke baryp, bilim alý jaǵdaiynda, iaǵni onyń múgedektik dárejesi jeńil bolýy yqtimal. Al ekinshi bala balalardyń sal aýrýymen aýyrýy múmkin. Sondyqtan olardy toptar boiynsha bólýdi josparlap otyrmyz», - dedi ol.
Eske sala ketsek, atalmysh baspasóz máslihatynda QR Bala quqyqtary jónindegi ýákil Arýjan Sain balalardyń shyǵarmashylyq jáne sporttyq úiirmeleriniń tegin bolýyn shektep turǵan kedergilerdi ataǵan edi. Onyń aitýynsha balalarǵa tegin úiirme uiymdastyrýǵa ákimdikter yńǵai tanyta qoimaǵan, iaǵni biýdjetten bul maqsatta qarajat bólgisi kelmei otyr.
