Byltyr elimizdiń keibir mektepterinde muǵalimder ózderine tiesili járdemaqyny tolyq kólemde ala almaǵan. Máselen, eńbek demalysyna nemese is saparǵa shyqqanda berilýi tiis aqshanyń ustazdarǵa tek belgili bir bóligi ǵana tólengen, – dep habarlaidy "Habar 24".
"2019 jyldyń birinshi jartyjyldyǵynda ustazdarymyzǵa 119 million teńgege jýyq qarajatty qaitaryp berdik. Jalaqylary durys eseptelinbegen. Eńbek demalysyna shyqqan kezde saýyqtyrý járdemaqysy da durys tólenbegen. Is-sapar shyǵyndary tolyq berilmegen", - deidi qazaqstandyq salalyq bilim jáne ǵylym qyzmetkerleri kásipodaǵynyń tóraiymy Aigúl Muqasheva.
Mysaly, Jambyl oblysy Turar Rysqulov aýdany Qaiyńdy aýylyndaǵy Smailov atyndaǵy orta mekteptiń 40 shaqty muǵalimi eńbek demalysyna shyqqan kezde beriletin járdemaqyny tolyq kólemde almaǵan. Aqyry kásipodaqtyń aralasýymen tólenbegen qyrýar qarajat pedagogtarǵa berilipti. Muny telefon arqyly bizge ustazdardyń biri aitty.
"Osy jazdygúni qosylmai qalǵan aqshamyzdy berdi, muǵalimderdiń aldy 60 myńnan, sońy 40 myńnan alyp, qýanyp otyrmyz", - deidi muǵalim Azizat Baidygelova.
"Ustazdarymyz eńbek demalysyna shyqqanda saýyqtyrý járdemaqysyn bir stavkamen tóleidi. Eńbek kodeksine bailanysty ustaz qansha saǵat júrgizedi, sol júktemesine bailanysty tóleý kerek", - dep túsindirdi Aigúl Muqasheva.
Iaǵni bul – elde bar problema. Aldaǵy ýaqytta mundai zańsyzdyqtyń bári jiti tekserilmek.
Taǵy bir jańalyq – mekteptegi muǵalimderdiń oqý júktemesi azaidy. Pedagogtar burynǵydai 18 saǵat emes, 16 saǵat jumys isteidi. Biraq budan ustazdardyń jalaqysy azaimaidy. Bul da – pedagogtyń quqyǵyn qorǵaýǵa baǵyttalǵan kóp sharanyń biri.
