QR Bilim jáne ǵylym vitse-ministri Bibigúl Asylova bilim berýdiń jańartylǵan mazmuny boiynsha sabaq beretin muǵalimderdiń jalaqysyna ústemeaqynyń qashan qosylatynyn aityp berdi, dep habarlaidy QazAqparat tilshisi.
«Jańartylǵan mazmun boiynsha sabaq beretin muǵalimderdiń júktemesi artqandyqtan, laýazymdyq jalaqysyn da arttyrý qarastyrylǵan. Qaýly 7 aqpan kúni shyqty, qazir óńirler shuǵyl tártipte esep júrgizedi jáne meniń paiymdaýymsha, aqpan aiynyń jalaqysy berilerde qańtar jáne aqpan ailarynyń ústeme aqysy birge túsedi», - dep jaýap berdi ol QR BǴM alqasynyń keńeitilgen otyrysy aiasynda jýrnalisterdiń suraǵyna.
Sonymen birge, vitse-ministr jalaqyǵa qosylǵan ústeme aqynyń azdyǵy týraly Parlament Májilisiniń depýtaty Gúljan Qaraǵusovanyń synyna jaýap berdi.
«Kabinetti meńgerý, synypqa jetekshilik etýge qosylatyn tólemder 5 myń teńgeden aspaidy, bul turǵyda Qaraǵusovanyń alańdaýshylyǵyn túsinemin. Biraq, qazir Memleket basshynyń tapsyrmasymen qarastyrylǵan laýazymdyq jalaqyny kóbeitýde anaǵurlym kóbirek aqsha qosylady. Máselen, orta eseppen muǵalimder 80 myń teńge alsa, 30% ústemeaqy dál osy 80 myń teńge negizinde, iaǵni shamamen 24 myń teńge qosylady», - dedi B. Asylova.
Vitse-ministrdiń aitýynsha, 1 qańtardan bastap, respýblika aýmaǵyndaǵy 90 myńǵa jýyq muǵalimniń jalaqysy kóbeiedi. 1 qyrkúiekten bastap 200 myń muǵalim ulttyq biliktilik testin tapsyrý arqyly óz eńbekaqylaryn kóbeite alady. Attestatsiianyń jańa erejeleri ázirlenip jatyr.
Buǵan deiin, Bibigúl Asylova óziniń qansha jalaqy alatynyn málim etken bolatyn.
