Foto: pixabay.com
Almaty turǵyny jekemenshik mektep qyzmetkerleri qyzyma psihologiialyq qysym kórsetti dep shaǵymdandy. Kópbalaly ananyń aitýynsha, bilim ordasynyń muǵalimderi men psihology birinshi synypta oqityn qyzdy ógei ákesi zorlady dep topshylap, jedel járdem shaqyrtqan, - dep habarlaidy Tengrinews.kz saity KTK telearnasyna silteme jasap.
Almaty turǵyny jekemenshik mekteptiń qyzmetkerleri kesirinen jeti jasar qyzy psihologiialyq aýyr soqqy aldy dep otyr. Ótken aptada áieldiń birinshi synypta oqityn qyzy sabaq kezinde qaita-qaita dárethanaǵa suranypty. Budan seziktengen muǵalimder oqýshyny suraqtyń astyna alǵan. Sosyn qyzǵa ógei ákesi zorlyq kórsetýi múmkin dep topshylap, jádel járdem shaǵyrǵan, deidi áiel.
"Mekteptiń psiholog apaiy, dárigeri men direktor orynbasary asyǵys diagnoz qoiyp, zorlaý múmkindigi boldy dep ózderi sheshim qabyldap, jedel járdem mamandaryna aityp bergen. Sóitip aýrýhanaǵa jetkizip, meniń ruqsatymsyz balany shyrqyratyp, balamnyń qursaǵy jaraqat aldy dep jazyp bergen", - dedi áiel.
Kópbalaly ana jaisyz habardy tek aýrýhanaǵa jetkende bir-aq bildim deidi. Iske politsiia aralasyp, bólimshege qyzdyń ógei ákesi de shaqyrtylǵan. Sosyn eki birdei meditsinalyq saraptama jasalypty. Onyń qorytyndysy boiynsha jetkinshektiń qýyǵyna sýyq tigen eken. Qazir shoshyp qalǵan qarshadai qyz emdelip jatyr.
"Biz qatty ashýlymyz. Namysymyzǵa tiip otyr. Kúieýimniń namysyna tiip otyr. Gúldei bolyp otyrǵan shańyraǵymdy ortaǵa túsirip otyr, bul kisilerdiń asyǵys sheshimimen. Menen surap, naqty sheshim bolǵanymen, birge baryp teksertý kerek edi, sondai jaǵdai bolǵan kúnniń ózinde. Osy iske qatysty nieti durys emes adamdar. Olar mektepte qalai bala tárbieleidi? Sol úshin osy iske qatysy bar adamdardy jumystan shyǵarýyn talap etemin", - deidi áiel.
Zańger Nurjan Quralbaevtyń aitýynsha, ata-ananyń qatysýynsyz kámeletke tolmaǵan baladan jaýap alýǵa jáne jynystyq múshesin tekserýge eshkimniń quqyǵy joq.
"Bul jaǵdaiǵa jekemenshik mektep qyzmetkerleriniń biliksizdigi sebep. №1 balalar aýrýhanasynyń dárigerlerine de suraq kóp. Olar qyzdyń ataanasyna eskertpei, óz betinshe tekseris júrgizip, jatyry zaqymdanǵan degen diagnoz qoidy. Eki birdei sot-meditsinalyq saraptama muny joqqa shyǵardy. Mundai qatelik bútin bir otbasyǵa keri áserin tigizdi. Mektep bolsyn, aýrýhanaǵa bolsyn, mundai keleńsiz jaitqa jol bermeýge tiis", - deidi zańger.
Balanyń anasy quqyq qorǵaý organdaryna aryz jazyp úlgergen. Bul janjal Oqý-aǵartý ministrligine deiin jetken. Ustazdardyń osyndai jaǵdaida qanshalyqty kásibi áreket etkenin anyqtaý maqsatynda jeke bilim berý mekemesinde tekserý bastalǵan.
