Muǵalimge degen qurmet onyń kásibi sheberligi men jeke qasietteriniń nátijesinde qalyptasady. Bul týraly oiymen 50 jyldyq ustazdyq tájiribesi bar almatylyq muǵalim, QR Bilim berý isiniń úzdigi Raýshan Toqbaeva bólisti, dep habarlaidy QazAqparat.
Raýshan Toqbaeva - Shyǵys Qazaqstan oblysynyń týmasy, kópbalaly otbasynda muǵalimdik joldy tańdaǵan jalǵyz bala.
«1968 jyly mektep bitirdim. Anam ylǵi aityp otyratyn, mamandyqtardyń ishindegi eń jaqsysy muǵalim bolý dep. Qarapaiym, kópbalaly otbasynan shyqqanmyn. Ata-anam aýylda sharýashylyqpen ainalysatyn. Institýtqa túsetin ýaqyt kelgende anamnyń keńesimen muǵalimdikke tústim.
1968 jyly arman qýyp Almatyǵa keldim. Sol jyly Qazaq Qyzdar pedagogikalyq ýniversitetine «orys tili men ádebieti muǵalimi» mamandyǵyna baǵym janyp oqýǵa tústim», - dedi ol.
Tájiribeli pedagog sol kezde eń irgeli, eń tereń bilimdi, óz isiniń mamandarynan tereń bilim alǵanyn aitty.
«Institýtta oqyp júrgen kezimizde Almatynyń mektepterinde tájiribeden ótetinbiz. Barlyq teoriialyq bilimimizdi tájiribe júzinde júzege asyrýǵa múmkindik boldy. Institýtty bitirgen soń men týǵan jerime oraldym.
Kókpekti aýdanynan 75 shaqyrymda Úlgili malshy aýylyna Abai atyndaǵy mektepke muǵalim bop keldim. 1972 jyldan eńbek jolym bastaldy», - dep jalǵady áńgimesin.
Ómir aǵyny Raýshandy óz mektebine ákeldi. 22 jasynda ol óz oqyǵan mektebine oqý isiniń meńgerýshisi bolyp oralǵan.
«22 jasymda men turmys qurdym. Otaǵasynyń kóshpeli qyzmet babyna sáikes jii jumys aýystyrýyma týra keldi. «Býkon» aýylyna muǵalim bolyp bardym, odan azdan soń aýdan ortalyǵyna keldik. Sol jyldary muǵalimder aýdandardy aralap aǵartý jumystaryn júrgizetin. Men de solardyń qatarynda boldym. Qurmet taqtasynda aýdannyń úzdik muǵalimi degen atym turdy», - dedi keiipker.
Jas maman 1984 jyly otbasymen Almaty oblysyna kóship kelgen.
«Qaskeleń aýdanyndaǵy «Bereke» aýylynda meniń mamandyǵym boiynsha bos oryn joq edi. Eńbek ótilim joǵalmaýy úshin bastaýysh synypqa sabaq berdim», - dedi ol.
Almaty oblysynda Raýshan Toqbaeva óziniń biliktiligi men kásibiliginiń arqasynda mektep direktorynyń orynbasary qyzmetine, 1992 jyly direktordyń birinshi orynbasary qyzmetine taǵaiyndalǵan.
2000 jyly Qazaqstanda jańa oqý standarty jasalǵan edi. Bul protseske eldegi eń bilikti ustazdar qatysqan. Raýshan Toqbaeva da eńbegi sińgen pedagog retinde osy mańyzdy qujatqa ózgerister men tolyqtyrýlar engizýge belsene atsalysqan.
Onyń aitýynsha, buryn muǵalim mártebesi óte biik bolǵan.
«Bizdiń zamanymyzda muǵalimdi óte syilaityn. Ol kezde biz kitap tapshylyǵynan bastap barlyq qiyndyqty bastan ótkerippiz. Ol kezde qazirgidei internet joq. Qazir nemerelerimdi oqyta otyryp, bilim berý salasynda kóp ózgeris baryn baiqaimyn. Balalar birinshi klastan bastap aǵylshyn tilin oqidy. Menińshe, bul bala úshin tym aýyr bolady. Óskeleń urpaqta til mádenieti qalyptasýy kerek. Olar birinshi kezekte qazaq jáne orys tilderin meńgerýi kerek. Shet tilin 4 klastan engizýge bolady», - dedi ol.
Qurmetti eńbek demalysyna kelgen kezde mektep ujymy Raýshan Hasenqyzynan qatardaǵy pán oqytýshysy bop qalýyn ótingen. Osylaisha tájiribeli ustaz taǵy 5 jyl balalardy bilim nárimen sýsyndatqan.
Biyl Raýshan Toqbaeva 70 jasqa tolady. Osy jasyna deiin bloknot pen qalamsaby qolynan túspeidi.
«Men keide óleń jazamyn. Án aitamyn. Túrli taqyryptarǵa esse, retsenziia jazyp turamyn»,- dedi ol.
Muǵalim eshqashan balany qorqytyp qurmetti bola almaidy. Ol tek jeke qasietteri men kásibi sheberliginiń arqasynda oqýshylardyń esinde qalady.
«Men eshqashan oqýshylarǵa ekilik qoimappyn. Eger balada qiyndyq bolsa, jaǵdaiyn bilýge tyrysatynmyn. Bizdiń aýyl kishkentai. Adamdar barlyǵy birin biri tanidy. Kópshilik otbasynda ne bolyp jatqanyn bilemin. Balalarmen ashyq sóilesýge tyrysatynmyn. Oqýshylarmen kezdesýge jiti daiyndalatynmyn. Sebebi, olardyń kez-kelgen suraǵyna jaýap berýim kerek»,- dedi ol.
Raýshan Toqbaeva 49 jyl muǵalimdik etken. Ustazdyq ǵumyrynda birneshe alǵys hattarmen marapattalǵan, Bilim berý isiniń úzdigi atanǵan.
«Meniń oqytqan 16 oqýshym Altyn belgi iegeri atandy. Kóptegen oqýshylarym óz isiniń mamanyna ainaldy. Adeliia Amraeva degen oqýshym qazir balalar jazýshysy. Fizika páninen Meiirjan men Rýslan Baimahanovtar Bolashaq baǵdarlamasymen shetelde oqyp keldi. Olardyń barlyǵy ómirden óz jolyn tapqanyna qýanamyn», - dedi ustaz.
