Reuters aqparat agenttigi Zimbabve prezidenti Robert Mýgabeniń otstavkaǵa ketkenin habarlady.
Agenttiktiń habarlaýynsha, Zimbabve parlamentiniń spikeri Djeikob Mýdenda seisenbide prezident Robert Mýgabeniń hatyn oqyp bergen. 93 jastaǵy avtokrat bileýshi óz hatynda "erikti túrde bilikti tapsyryp bergenin", "biliktiń beibit túrde aýysýyn qalaǵanyn" málimdegen.
«Men, Robert Gabriel Mýgabe, Zimbabve prezidenti laýazymynan otstavkaǵa ketetinimdi resmi túrde málimdeimin. Bul sheshim dereý iske asady», - dep jazady Reuters agenttigi Mýgabeniń málimdemesin keltire otyryp.
Zimbabve depýtattary málimdemeni estigende shattanyp, qýanǵan. Sol shaqta el astanasy Hararede halyq kóshege shyǵyp, aitýly oqiǵany toilai bastaǵan.
15 qarashada Zimbabvede áskeriler tóńkeris jasap, bilikti basyp alǵan. Al 19 qarashada "Zimbabveniń afrikalyq ulttyq odaǵy – Patriottyq maidan" partiiasy Mýgabeni partiia basshylyǵynan alyp, bilikten ketpese impichment jariialaitynyn málimdegen. Osy kúni Mýgabe eldegi CNN arnasynyń efirinde sóilegen sózinde "bilikten ketpeitinin" aitqan edi.
Esterińizge sala keteiik, 93 jastaǵy Robert Mýgabe Zimbabve Ulybritaniiadan táýelsizdik alǵan 1980 jyldan beri bilikte otyrǵan.
