«Islam memleketi» terroristik tobyna (QR-da tyiym salynǵan) qatysy bar jaýyngerler Mozambiktiń soltústigindegi eki aýyl turǵyndaryn jappai qyryp tastaǵan, dep habarlaidy QazAqparat «Ál-Jazira» basylymyna silteme jasap.
Kýágerlerdiń aitýynsha, islamshyl-kóterilisshiler qurbandardy Mýatide aýylyndaǵy fýtbol alańyna aparyp óltirgen. Politsiianyń habarlaýynsha, keiingi úsh kúnde shabýyl jasaýshylar Mozambiktiń soltústigindegi gazǵa bai Kabý-Delgadý provintsiiasynda 50-den astam adamdy óltirip, múshelep tastaǵan. Kúsh kórsetý áli de jalǵasyp jatyr.
Mozambik politsiiasynyń bas qolbasshysy Bernardino Rafaeldiń aqparaty boiynsha, «Islam memleketine» qatysy bar sodyrlar Miýdýmbe jáne Makomiia aimaǵyndaǵy birneshe aýylǵa shabýyl jasap, beibit turǵyndardy óltirip, áielder men balalardy urlap, úilerdi órtegen. Keibir sarapshylar, tártipsizdiktiń túp-tórkini dinde emes, eldegi kedeilik pen teńsizdikte bolýy múmkin dep esepteidi. Olar ózderin «Ash-Shabab» dep ataityn islamshylardyń Somalide bailanysy joq ekenine senimdi.
Tártipsizdik saldarynan 2017 jyldan beri 2000-nan asa adam mert boldy, olardyń jartysynan kóbi – qarapaiym turǵyndar.
Ótken aida jariialanǵan Amnesty International esebi boiynsha, Kabý-Delgadýdaǵy shabýyldar gýmanitarlyq daǵdarysqa ákep soqty. 300 000-nan asa adam qonys aýdarýǵa májbúr boldy jáne 712 000 turǵyn gýmanitarlyq kómekke muqtaj.
Eske sala ketsek, bul sońǵy ýaqyttaǵy jihadshylar jasaýy múmkin delingen alǵashqy terakt emes. Buǵan deiin islamshylar Frantsiia men Aýstriia astanasy Venada sumdyq terakt jasaǵan bolatyn.
