Búgin Nur-Sultan qalasynyń birneshe saýda ortalyǵynda sanitarlyq talaptardy saqtaýǵa úndeýge baǵyttalǵan aqparattyq túsindirý jumystary júrgizildi, dep habarlaidy "Ult aqparat".
«Bizdiń maqsat – saýda ortalyqtaryna kelýshiler men sonda jumys isteitin adamdarǵa sanitarlyq talaptardy saqtaýǵa qatysty túsindirý jumystaryn ótkizý. Biz sanitarlyq talapty buzǵan adamdardy ustap alyp aiyppul salmaimyz, tek talapty buzbaýǵa shaqyramyz. Al hattama toltyryp, aiyppul salýmen arnaiy monitoringilik top ainalysady. Onyń quramynda quzyrly organ ókilderi bar. Elimizdiń bas sanitar dárigeri bekitken ortaq sanitarlyq talap bar, onda barlyǵy tizbektelip jazylǵan. Biz sony saqtaýǵa tiispiz jáne saýda ortalyqtary da erejege sai jumys isteýi kerek. Óz tarapymyzdan saýda men biznestiń turalap qalmaýy úshin bar múmkindikti jasap jatyrmyz. Osy oraida saýda jáne biznes ókilderi de túsinistikpen qarap, tiisti talaptardy saqtaǵany jón», - dedi Nur-Sultan qalasy ákimdigine qarasty Qyzmet kórsetý salasy jáne saýdany damytý bóliminiń jetekshisi Rýslan Ydyrysov.
Elordalyqtardy sanitarlyq talaptardy saqtaýǵa shaqyrý maqsatynda quramynda sanitarlyq-epidemiologiialyq qyzmettiń ókili, politsiia qyzmetkeri jáne qalalyq ákimdik ókili bar monitoringilik top 3 iri saýda ortalyǵyn aralap, túsindirý ótkizdi.
«Bizdiń saýda ortalyqta barlyq sanitarlyq talap saqtalady. Árine adami faktorlar bolyp turady. Iaǵni saýda ortalyǵyna maskamen kirip, birazdan soń sheship tastaidy. Ondai jaǵdaida biz kelýshige maska taǵyp júrý kerektigin eskertemiz. Kelýshilerdiń arasynda men aýyryp júrgen joqpyn, sondyqtan maska taqpaimyn deýshiler de kezdesedi. Talap bárimizge ortaq, sondyqtan ondai azamattarǵa ótinish aityp nemese túsindirý jumysyn ótkizgennen basqa amal joq», - deidi elordadaǵy saýda ortalyǵynyń biriniń ákimshisi Larisa Potoký.
Buǵan deiin habarlaǵanymyzdai, elordada tamaqtaný oryndarynyń sanitarlyq talaptardy jii buzatyny anyqtaldy.
