Mońǵoliianyń Baian-Ólgii aimaǵynda selden keiin salynyp jatqan úidiń biri. Sýret Sairan esimdi áleýmettik jeli qoldanýshydan alyndy.
"Mońǵoliiadaǵy tasqynnan zardap shekkenderge arnap qazaqstandyq belsendiler salǵyzyp jatqan keibir úiler «qaýipti zonada turǵandyqtan» buzylatyn boldy", - dep jazady Azattyq. Bul týraly Ult.kz tilshisi habarlaidy.
Mońǵoliianyń Baian-Ólgii aimaǵynyń turǵyny Sairan – segiz balanyń anasy, jalǵyzbasty áiel. Otbasyn qurǵan úlken tórt balasy Qazaqstanǵa kóshken. Kámeletke tolmaǵan tórt balasymen Ólgii qalasynda turady. Shildeniń 10-ynda bolǵan tasqynnan soń Sairannyń úii jaramsyz bolyp qalǵan. Apattan keiin Qazaqstanda azamattyq belsendiler áleýmettik jeli arqyly jurttan qarjy jinap, turmysy nashar bes úige baspana salyp berýdi uiǵarǵan. Solardyń qatarynda Sairannyń shańyraǵy da bar.
- Úidiń irgetasyn quiyp, kirpishterin qalaǵan bolatyn. 50 paiyzy bitip turǵan edi. Endi kelip, ákimshilik qyzmetkerleri: «Úidi buz. Zańsyz jerge salynǵan» dep jatyr, - deidi Sairan.
«PARTIIa TARTYSY BOLÝY MÚMKIN»
Qazaqstandyq belsendiler jinaǵan aqshanyń bólinip, jumsalýyn qadaǵalap júrgen baian-ólgiilik belsendi Aidos Azat:
- O basta ákimshilik ózi belgilep bergen jerge úi salynǵan. Biraq bul jerde partiia tartysy bolyp jatýy múmkin, - dep boljaidy.
Baian-Ólgii aimaǵyndaǵy 200-ge jýyq úidi sý shaiyp, 700 turǵyn baspanasyz qalyp jatqan kez Mońǵoliiadaǵy parlament sailaýymen tuspa-tus kelgen edi. Sol kezde bilik basynda otyrǵan Demokratiialyq partiia ókilderi tasqynnan zardap shekken 100 úige jańadan baspana salý úshin jer bólgen. Jergilikti turǵyndardyń aitýynsha, burynǵy bilik basynda otyrǵan Demokratiialyq partiia jeńilip, ornyna kelgen Mońǵoliia halyq partiiasy jer bólý sheshimin zańsyz dep tapqan.
Mońǵoliianyń Baian-Ólgii aimaǵynda tasqynnan zardap shekkenderge arnap salynyp jatqan úidiń biri. Sýret Sairan esimdi áleýmettik jeli qoldanýshy paraqshasynan alyndy.
- Qazaqstannan kelgen jigitter (belsendiler – red.) basynda qansha qarjy ákelgenin aitty. Oilana kele «jaǵdaiy joq bes otbasyǵa úi salyp bereiik» dep sheshim qabyldady. Qazir úsh úi salynyp bitýge taiap qaldy. Eki úi endi bastalyp, salynyp jatyr. Biraq [jergilikti bilik] basynda kórsetip bergen jerlerin endi «durys emes» (zańdy ýchaskege túspegen – red.) dep, sonyń saldarynan eki úiimiz buzylǵaly jatyr. Bul endi basyndaǵy basshylyqtyń teristigi, - deidi Aidos Azat.
Ózin tek Asqar dep tanystyrǵan Baian-Ólgii aimaq ákimshiliginiń qyzmetkeri Azattyqqa jer ýchaskeleriniń ne sebepti jaramsyz dep tanylǵanyn túsindirdi.
- Aeroportqa tym jaqyn, qaýipti zonaǵa kirip ketken. Buny elektr júiesin tartý kezinde kórip, úi salýdy toqtatý jóninde sheshim qabyldanǵan, - dedi ol.
Biraq Asqar naqty qansha úidiń qaýipti zonaǵa kirip ketkenin aityp bere almady.
JAŃA ÁKIMNIŃ JAÝABY
Úisiz qalǵan Sairan jańa ákimniń bólip bergen jerine kiiz úimen kóship barǵanyn, jartylai salynǵan úiiniń turǵanyn, ony buzyp ákep qaita salýǵa qarjysynyń joq ekenin aitady.
Baian-Ólgii aimaǵynyń ákimi Ǵylymhan Aiypuly 20 úidiń qaýipti aimaqqa kirip ketkenin rastady.
- Úkimet aýysyp, aldyńǵy kisiler (áýelgi basshylar – red.) kóp mán bermei, sheshilmegen máselelerge aralasyp, kirisip jatyrmyz. Qyzmetke kelgeli bir apta bolǵan. Komissiia qurylyp, tekserilmegen. Jiyrmadai úige berilgen jer aeroportqa jaqyn. Samolettiń ushyp-qonýyna keri áserin tigizedi degen mamandar qorytyndysy shyqqan. Sol boiynsha ol 20 úige basqa jerden jer bólinip berildi, - deidi aimaqtyń jańa ákimi.
Ǵylymhan Aiypuly da Azattyqqa «qaýipti zonaǵa» naqty qansha úidiń salyna bastaǵanyn anyqtap aityp bere almady.
Aimaq ákimi úkimet tarabynan 100 otbasyǵa kiiz úi taratylǵanyn habarlady. Elektr jaryǵyn tartý jáne úsh-tórt jerden qudyq qazý máselesin qarastyryp jatqanyn aitty. Azattyq tilshisiniń «Úilerin jartylai salyp qoiǵan turǵyndardyń shyǵynyn kim ótep beredi?» degen saýalyna «Bilmeimin» dep qysqa qaiyrdy.
Qazaqstandyq belsendi Aiatjan Ahmetjannyń bastaýymen áleýmettik jeli qoldanýshylary Baian-Ólgiidegi tasqynnan zardap shekkenderge kómektesý maqsatynda qarjy jinaǵan bolatyn. Belsendi Azattyqqa jinalǵan 2 million 500 myńǵa jýyq qarjyny Baian-Ólgiige jetkizip, bes otbasyna 32 sharshy metrlik baspana turǵyzyp berýge kiriskenderin aitty. Budan basqa, Qazaqstan biligi Baian-Ólgiidegi tasqyn sýdan zardap shekkenderge arnap 200 myń AQSh dollaryn bólgen bolatyn.
