Foto: Aqorda
Aqordada Mońǵoliia Prezidenti Ýhnaagiin Hýrelsýhty saltanatty qarsy alý rásimi ótti, dep habarlaidy Ult.kz.
Memleketter basshylary bir-birine delegatsiia múshelerin tanystyrǵan soń Qurmet qaraýylynyń bastyǵy raport berip, eki eldiń ánurandary oryndaldy.
Osydan keiin Qazaqstan men Mońǵoliia prezidentteri shaǵyn quramda kelissóz júrgizdi.
Qasym-Jomart Toqaev Mońǵoliiamen tarihy ortaq, tamyry bir baýyrlas elder ekenimizdi, kóshpendi halyqtardyń urpaǵy ekenimizdi aitty.
"Qazaq pen mońǵol – ǵasyrlar boiy irgesi bólinbegen kórshiler. Halyqtarymyzdyń ómir salty, ádet-ǵurpy óte uqsas. Qazir de osy máńgi qundylyqtardy arqaý etip kelemiz. Búginde yqpaldastyǵymyz strategiialyq seriktestik rýhynda damýda. Memleketaralyq, parlamentaralyq jáne úkimetaralyq bailanystarymyz nyǵaiýda. Qurmetti Prezident myrza, Siz ekijaqty qarym-qatynasymyzdy jańa deńgeige kóterýge zor úles qosyp kelesiz. Muny joǵary baǵalaimyz. Qajyrly eńbegińizdiń arqasynda Mońǵoliiada kóptegen oń ózgeris bolyp jatyr. Byltyr elińizdiń ekonomikasy 6,8 paiyzǵa ósti. Bul Sizdiń saliqaly basshylyǵyńyzdyń jemisi ekeni sózsiz. Siz halqyńyzdyń ál-aýqatyn jaqsartý úshin mańyzdy bastamalardy júzege asyrdyńyz. Mońǵoliiada memleketti damytýǵa arnalǵan «Vision-2050» keshendi jospary qolǵa alynǵanyn bilemiz. Sondai-aq Qaraqorym atty jańa qala salýdy bastap kettińizder. Biregei jobalardyń tabysty bolýyna tilektespiz. Sarabdal saiasatyńyzdyń arqasynda Mońǵoliianyń halyqaralyq bedeli arta tústi. Biz baýyrlas eldiń barlyq jetistigine qýanamyz", – dedi Memleket basshysy.
Mońǵoliia prezidenti Ýhnaagiin Hýrelsýh araǵa jiyrma jyl salyp Qazaqstanǵa memlekettik saparmen kelgenine qýanyshyn jasyrmady.
"Sizdiń osydan eki jyl buryn bizdiń elimizge jasaǵan memlekettik saparyńyz mońǵol-qazaq qarym-qatynastaryn strategiialyq seriktestiktiń jańa deńgeiine kóterdi. Bul ýaqiǵa ekijaqty bailanystar tarihyna altyn árippen jazylatyny sózsiz. Qurmetti Prezident myrza, Sizdiń kóregen, parasatty jáne joǵary kásibi basshylyǵyńyzdyń arqasynda Qazaqstan ekonomikalyq jáne áleýmettik salalardy damytýda aitarlyqtai tabysqa jetti. Mońǵol halqy elińizdiń jetistikterin jiti baqylap otyr. 2024 jylǵy Mońǵoliiaǵa saparyńyz barysynda onnan astam qujatqa qol qoiyldy. Búgin de birqatar mańyzdy qujattar qabyldanady", – dedi Mońǵoliia Prezidenti.
