Búgin Mońǵoliianyń premer-ministri Ýhnaagiin Hýrelsýh óziniń otstavkaǵa ketetini týraly resmi túrde jariialady, dep habarlaidy "Ult aqparat" MONTsAME agenttigine silteme jasap.
Arnaiy ótken baspasóz máslihatynda ol eki kún buryn jańa bosanǵan áieldi nárestesimen birge astanalyq perzenthanadan Ulttyq ishek aýrýlaryn zertteý ortalyǵyna aýystyrý jaǵdaiyn eske túsirip, jaýapty tulǵalardyń jibergen qateligi men raqymsyzdyǵy úshin ókinishin bildirdi.
«Memlekettik qyzmetkerlerdiń atynan olardyń jaýapsyzdyǵy úshin jáne ózimniń atymnan bolǵan oqiǵaǵa bailanysty ókinishimdi bildiremin», - dep málimdedi Ý.Hýrelsýh.
Budan keiin ol Covid-19 pandemiiasy jaǵdaiynda 1.6 mln turǵyny bar el astanasynda qatań karantin jáne keibir aimaqtarda qozǵalysty tolyq shekteý boiynsha sharalar qoldanylǵanyn aitty. Premer-ministr bul jerde qatelikter jiberilgenin atap ótti.
«Meniń kabinetimniń eki múshesi atalǵan qatelikterge jol bergenine qatysty otstavkaǵa ketýdi surady. Bul kabinet alǵash ret qurylǵanda, biz komandamen jumys isteýdi josparlaǵan edik. Ókinishke qarai, bulai bolmady. Halyq osyǵan bailanysty alańdaýshylyq bildirdi. Jas azamattardyń úkimetke ókinishin bildirý úshin kóshege shyqqany durys. Premer-ministr retinde osyndai sheshim qabyldap otyrmyn, jaýapkershilik bárimizge ortaq bolýy tiis», - dedi Ý. Hýrelsýh.
