Moldova parlamenti orys tiliniń qoldaný aiasyn keńeitip, resmi mártebe berýdi qarastyratyn zań jobasyn birinshi oqylymda maquldady. Buǵan qosa, Resei arnalaryn transliatsiia jasaýǵa múmkindik beretin túzetýlerdi qabyldady.
Orys tiline resmi mártebe berilse, memlekettik qyzmetkerler turǵyndar saýalyna orys tilinde jaýap berip, aqparat beredi. Beisenbi kúni qabyldanǵan túzetýler sonymen birge dári-dármek nusqaýlyqtaryn orys tiline aýdarýdy mindetteidi.
Zań jobasy sotsialister partiiasy atynan sailanǵan qazirgi prezident Igor Dodon bastamasymen ázirlengen. 101 depýtattyń 51-i oǵan qoldap daýys bergen. Jobaǵa parlamenttegi oppozitsiia men jańadan sailanǵan prezident Maiia Sandý qarsy shyqqan.
Qarasha aiynda Moldovada prezident sailaýy ótip, Sandý jeńiske jetken edi. Sailaýdyń ekinshi kezeńiniń nátijesi boiynsha, Sandýǵa sailaýshylardyń 57,7 paiyzy daýys bergen. Al Dodon 42 paiyz daýys alǵan. Onyń ókileti 23 jeltoqsanda aiaqtalady.
Beisenbi kúni Moldova depýtattary sonymen birge arnaiy qyzmetti baqylaýdy parlamentke júkteitin zań jobasyn ekinshi oqylymda maquldady. Sandý jaqtastary sheshimmen kelispeidi jáne ony "bilikti basyp alý talpynysy" dep atady. Zań jobasyna qarsylar osyǵan deiin Kishinev ortalyǵyndaǵy kóshelerdi jaýyp, narazylyq bildirgen.
Jaqtastaryn jeksenbi kúni narazylyqqa shyǵýǵa shaqyrǵan Sandý "halyqqa qarsy shyqqan parlament qulatylýy tiis" dedi.
