Qazaqstan Respýblikasynyń Memlekettik hatshysy Qyrymbek Kósherbaev M. V. Lomonosov atyndaǵy Máskeý memlekettik ýniversitetiniń Qazaqstan filialyna qandai ǵimarat beriletinin aitty, dep habarlaidy QazAqparat.
«Biyl elimiz úshin erekshe jyl. Óitkeni ultymyz úshin uly, halqymyz úshin qadirli, memleketimiz úshin eń mártebeli qundylyq – Táýelsizdiktiń 30 jyldyǵy! Sizderdi ulysymyzdyń uly merekesimen shyn júrekten quttyqtaimyn! Táýelsizdikti alý bar da, ony tuǵyrly etý bar. Osynaý 30 jyl ishinde Qazaqstan ǵasyrǵa parapar joldan ótti. Tuńǵysh Prezident – Elbasy Nursultan Nazarbaevtyń kóshbasshylyǵymen elimiz áleýmettik-ekonomikalyq turǵydan turaqty damý jolyna tústi, qoǵamdyq-saiasi ahýal qalyptasty. Shekaramyz shegendelip, jańa elordamyz boi kóterdi. Halqymyzdyń sany artty, yrys-berekesi molaidy. Elbasy bastaǵan joldy Memleket Basshysy Qasym-Jomart Kemeluly Toqaev laiyqty jalǵastyryp, halqymyz órkeniettiń órine kóz tigip otyr», - dedi Memlekettik hatshy MMÝ Qazaqstan filialynda ótken mereitoi keshinde.
Óz sózinde Memlekettik hatshy egemendiktiń bir tuǵyry – dostyq ekenin, ótken tarihta qazaqtyń talai asyl arystary Reseide bilim alyp, jetilgenin atap ótti.
«Arǵy zamanda da, keshegi keńestik kezeńde de, búgingi táýelsizdik ýaqytynda da bizdiń bilim izdep, ilim qýǵan jastarymyzdyń kóbi Reseidi tańdady. Sebebi ondaǵy bilim berý isiniń tamyry tereń. Sonyń biri, tipti biregeii – M. Lomonosov atyndaǵy Máskeý memlekettik ýniversiteti. Atalǵan oqý ornyn bitirgen talai túlek búginde azat Qazaqstannyń áleýmettik-ekonomikalyq ahýalyn kóterýge belsendi atsalysyp júr.
MMÝ-dyń alǵashqy sheteldik filialynyń bizdiń astanamyzda ashylýy Qazaqstan men Resei arasyndaǵy dostyq, baýyrlastyq bailanystardyń jarqyn aiǵaǵy boldy. Osy oqiǵanyń arqasynda kóp jyldyq dástúri bar Qazaqstan men Reseidiń ǵylymi-bilim berý bailanystary jańa serpinge ie boldy», - dedi Memlekettik hatshy.
Aita keteiik, M. V. Lomonosov atyndaǵy MMÝ Qazaqstan filialy QR Tuńǵysh Prezidenti - Elbasy Nursultan Nazarbaevtyń bastamasymen jáne RF Prezidenti Vladimir Pýtinniń qoldaýymen qurylǵan.
2000 jylǵy 9 qazanda Resei Federatsiiasynyń Prezidenti V.V. Pýtinniń Qazaqstan Respýblikasyna jasaǵan memlekettik saparynda MMÝ rektory, akademik V.A. Sadovnichii men QR Bilim jáne ǵylym ministri Q.E.Kósherbaev Astana qalasynda L.N.Gýmilev atyndaǵy Eýraziialyq ulttyq ýniversitettiń bazasynda M.V. Lomonosov atyndaǵy Máskeý memlekettik ýniversitetiniń Qazaqstan filialyn qurý týraly hattamaǵa qol qoiǵan bolatyn.
