Foto: ©️ Tengrinews.kz / Turar Qazanǵapov
Qarjy ministrliginiń Memlekettik kirister komiteti mobildi aýdarymdardy baqylaýǵa bailanysty qolma-qol aqshaǵa kóshemiz dep qorqytyp júrgen qazaqstandyqtarǵa jaýap berdi, - dep habarlaidy Tengrinews.kz saity.
Jýrnalister suraǵyna QR QM MKK jeke tulǵalardyń kásipkerlik qyzmetin jáne arnaiy salyq rejimderin ákimshilendirý departamentiniń direktory Nurjan Qýandyqov jaýap berdi.
"Uialy aýdarymdardy tekserýge bailanysty qolma-qol aqshaǵa kóshemiz dep qorqytyp júrgen qazaqstandyqtarǵa ne aita alasyz?" – dep surady jýrnalisterdiń biri.
"Olai ásireleýdiń qajeti joq, bárimiz bizdiń qoǵamda ómir súrip jatyrmyz, men áielime aqsha aýdara alamyn, ata-anama nemese dostaryma aqsha aýdara alamyn. Mundai jeke maqsattarda ol qaralmaidy. Mysaly, adam únemi bir tólem alady, biraq mundai tólemder kriteriilerge jatpaidy. Bul kásipkerlerge qatysty. Iaǵni, qyzmetteri úshin aqy alatyn adamdar", - dep jaýap berdi ol.
MKK ókili qazaqstandyqtardyń kásipkerlik qyzmet úshin jáne jeke basyna bólek kartasy bolýy qajet dep esepteidi.
"Jeke kartaǵa túsetin barlyq aqshaǵa salyq salynbaidy, bul - sizdiń jeke aqshańyz. Biraq adam kásipkerlik qyzmetti júzege asyrǵan kezde, ol aqshany biznes-kartaǵa alýy kerek, sáikesinshe salyq tóleýi kerek. Bul jerde adamdardyń salyq tólemeýine ózimiz úles qosatynymyz ádiletti emes. Kásipkerlerdiń arnaiy salyq rejimi bar. Eger adam jeńildetilgen deklaratsiiany qoldansa - 3 paiyz, bólshek salyq - 4 paiyz. Keibir aimaqtarda tipti bul paiyz azaiady.
Mundai kásipkerlerge olardyń zańǵa baǵynýy úshin jaǵdailar jasalǵan. Sonymen qatar, jaldamaly jumysshylar retinde jalaqy alatyn adamdar 10 paiyz tóleidi. Bul jerde adal salyq tóleýshiler úshin qorqatyn eshteńe joq dep aitý kerek. Biraq óz biznes-kartasyna tólem qabyldaýǵa kedergi keltiretin kásipkerlerge suraq týyndaidy", - dep túiindedi Qýandyqov.
