Qazaqstandyq mánerlep syrǵanaýshy Mihail Shaidorov áleýmettik jelide jazba jariialap, ózine qatysty taraǵan aqparattarǵa túsinikteme berdi, dep habarlaidy Ult.kz.
Sportshy eń aldymen qazaqstandyqtarǵa qoldaý bildirgeni úshin alǵys aityp, jalǵan aqparatqa senbei, ózine senim artqandarǵa rizashylyǵyn jetkizdi.
Mihail Shaidorovtyń aitýynsha, ol 2025 jyly álem chempionatynda kúmis júlde jeńip alyp, Qazaqstannyń eńbek sińirgen sport sheberi normativin oryndaǵan. Alaida osy kúnge deiin tiisti kýálikti almaǵanyn málimdedi.
— Bul jerde saltanatty rásim mańyzdy emes. Qujatty poshta arqyly alsam da jetkilikti. Biraq ol — meniń on jyldyq eńbegimniń nátijesi, — dedi sportshy.
Sondai-aq ol Olimpiada júldesine bailanysty beriletin syiaqylarǵa qatysty eshqandai shaǵymy joǵyn aitty. Onyń sózinshe, bul rásim ýaqytty talap etedi jáne jumys júrip jatqanyna senimdi.
Ómir boiy tólenetin tólemder týraly pikir bildirgen sportshy qazirgi tańda mundai tólemderdi alýǵa quqyǵy joǵyn atap ótti. Sebebi oǵan keminde 20 jyl eńbek ótili qajet, al qazir jasy nebári 21-de.
Shaidorov jalaqy máselesine de toqtaldy. Aitýynsha, ol jáne komandasy Sportty qoldaý qorynyń qarjylandyrýdy qarastyrýyna bailanysty sońǵy bes ai boiy jalaqy almaǵan.
Sonymen qatar sportshy 2026 jylǵa arnalǵan kelisimsharttaǵy bir tarmaqqa qatysty kelispeýshilik týǵanyn aitty. Qujatta 2030 jylǵy Olimpiadadan medal jeńip alý mindeti kórsetilgen.
— 2026 jylǵy kelisimshartta 2030 jylǵy Olimpiadaǵa qatysty mindettemeniń bolýy qisynsyz. Biz tek osy tarmaqty zańgerlermen qaita qaraýdy suradyq, — dedi ol.
Sportshy jańa maýsymǵa daiyndyq máseleleri de uzaq ýaqyt boiy nazardan tys qalǵanyn jetkizdi. Onyń aitýynsha, 5 maýsymǵa josparlanǵan oqý-jattyǵý jiyndary boiynsha birneshe ret habarlasqanymen, naqty jaýap bolmaǵan.
— Aqpan aiynan beri tipti dárigerim de joq, — dedi Mihail Shaidorov.
Ol eger maýsymǵa qajetti qarjylandyrý tolyq sheshilse, tólenbei qalǵan jalaqysyn Balalardy qorǵaý kúnine orai balalarǵa kómek kórsetýge baǵyttaitynyn málimdedi.
— Bul meni qoldap júrgen qazaqstandyqtar atynan balalarǵa arnalǵan syilyq bolsyn, — dep jazdy sportshy.
