Ózbekstan prezidenti Shavkat Mirziiaev 25 qańtarda eldiń alǵashqy prezidenti Islam Karimovti máńgi este qaldyrý týraly qaýly shyǵardy, dep habarlaidy "Ult aqparat" centralasian.org agenttigine silteme jasap.
Qaýly boiynsha, Ózbekstanda birneshe mekeme men nysanǵa, onyń ishinde Tashkent memlekettik tehnikalyq ýniversitetine, Asaktaǵy kólik qurastyrý zaýytyna, Ferǵanadaǵy Óner saraiyna, Tashkenttegi halyqaralyq áýejaiǵa, Qaraqalpaqstan, Tashkent pen birneshe qalalardaǵy ortalyq kóshelerge Karimovtiń esimi berilmek. Qujatta sonymen qatar Samarqanda Islam Karimov jerlengen jerge memorialdy keshen turǵyzylatyny aitylǵan.
Ótken jyldyń sońynda Ózbekstan biligi Karimovke eskertkish turǵyzýǵa konkýrs jariialanǵan. Onyń qorytyndysy boiynsha Tashkentte, Karimov týyp-ósken Samarqanda, Qashqadariia oblysynyń jetekshisi bolyp qyzmet istegen Karshi qalasynda eskertkishter ornatylatyn bolǵan.
Mirziiaevtiń jańa qaýlysy boiynsha, Ózbekstanda jyl saiyn 30 qyrkúiekte Karimovtiń týǵan kúni toilanyp, 2 qyrkúiek Tuńǵysh prezidentti eske alý kúni kúni dep jariialanady. Ózbekstan biligi memlekettik BAQ-ty Karimovti eske alýmen bailanysty sharalardan habar taratýǵa mindettedi.
Ózbekstandy 1989 jyldan beri 27 jylǵa jýyq ýaqyt basqarǵan Islam Karimov 79 jasynda qaitys boldy. Onyń ólimi týraly alǵashqy habar 2016 jyly 29 tamyzda shyqty. Karimovtiń qaitys bolǵany týraly resmi túrde 2 qyrkúiekte habarlandy. Karimovtiń óliminen soń prezident mindetin ýaqytsha sol kezdegi premer-ministr Shavkat Mirziiaev atqaryp, keiin ol prezident bolyp sailandy.
