Tanymal jas aqyn Miras Asannyń sońǵy jyldary jazǵan bir top óleńiń nazarlaryńyzǵa usynamyz.
***
Belgilep siz turatyn kósheni, kúz,
Kezdesti bizdiń kiim-keshegimiz...
Aita almas meniń sebep - múkistigim,
Estimes sizdiń sebep - keselińiz...
Shalbardyń qyry synyp sáki aldynda,
Sómkeler iyqtaǵy, batar muńǵa...
Qolǵaptar birin-biri qatty qysyp,
Qydyrar qolshatyrlar qatar qyrda...
Batyrǵan sol oramal bizdi armanǵa,
Biz sonda nege adastyq - júz barǵanǵa?
Túimeler aǵytyldy, ystyqtan ba?
Jaǵalar kóterilerdi, yzǵardan ba?
Jylaǵan sholpy ma eken, syrǵa ma eken?
Saǵatym ony nege tyńdady eken?
Kúrteshem nege úige keshteý keldi?
Paltońyz nege jeńin bulǵady eken?
Shliapam nege taǵy baqqa ap keldi,
Etigim nege óz izin taptap, kómdi?
Bókebai ol átirdi nege umytty?
Ol hatty qalta nege saqtap keldi?
27.HII.2016
***
Alatyn túgim joq demeýlik,
Beretin túgim joq baiý úshin.
Men Sizden qol alam, sheneýnik,
Men Sizge jol berem, qaiyrshym.
Kelińiz, qol berem, jaýyr, túk,
Baryńyz, men Sizge jol berem.
Tym qatty qyspańyz, aýyrtyp,
Tym uzaq ótpeńiz, kóldeneń.
Aqynǵa Qudaidai senińiz,
Jyryna Qurandai nanyńyz.
Siz madam-qoldardy berińiz,
Dýeliant-joldardy alyńyz.
Men Sizge qol berem, ishpeimin,
Jol berem, syilyqtan bas tartam.
Siz qoiǵan sharttardy isteimin,
Tóbeles ashpaimyn tas-talqan.
Qol berem, qasyma kelińiz,
Jol berem, bul jerden ketińiz.
Saleri-qoldardy berińiz,
Danteske bergen jol, ótińiz.
***
Miymda kúlimdep júresiń,
Úiimde tunjyrap jatasyń.
Shai quiý keregin bilesiń,
Ý quiyp qoiasyń shatasyp...
Biz jaily oqyǵan kitabyń,
Kúz jaily toqyǵan toqymań...
Sen bergen ýdy únsiz jutamyn,
Sen bergen shaidy iship otyram.
Oi men ý sanada shaiqasyp,
Birdeme aitpaq bop, tosylam...
Sen jańbyr jaýǵanyn aitasyń,
Men taǵdyr jazǵanyn jasyram...
04.V.2017
***
Kúlkimdi de tozdyrdym kie-kie,
Muń da tozdy, ish - qazan kúie-kúie.
Tozdy mańdai taý-tasqa soǵylýmen,
Tozdy alaqan qoshemet, qol urýmen.
Úmit tozdy kútýden, kezigýden,
Kúdik tozdy jaqynnan bezinýden.
Taban tozdy armandy qýalaýdan,
Janar tozdy oianý, kóz ilýden...
Tozdy miym - tánimniń aqylmany,
Tozdy kúiim, eskirip jatyr bári...
Júrek tozdy sezim - bal, aqyl - ýdan,
Bilek tozdy baqytty shaqyrýdan...
Tozǵan iyq, tozǵan bas, til ushym kem,
Aiǵailaimyn jalǵanǵa qur ishimnen...
Tózip kele jatyrmyn kim úshin men?
Tozyp bara jatyrmyn kim úshin men?
Kereǵar
Zańǵar bar biikten qorqatyn,
Muhit bar tamshydan orta tym.
Kezeń bar qyzǵaldaq baspaityn,
Ózen bar shólderge bastaityn.
Eshkim kep qaqpaityn qaqpa bar,
Eshkim bor jaqpaityn taqta bar.
Aramdyq jaqtaityn shyndyq bar,
Adaldyq taptaityn maqta bar.
Sulýdy kórmeitin kózder bar,
Sulýdy tergeitin sózder bar.
Jaqyndy jek kórip ólerdei,
Bótenge "kel" deitin kezder bar.
Sezimge senbeitin kezder bar,
Sezimge "Sen" deitin kezder bar.
Qaitarmai qalatyn jaýap bar,
Qaita almai qalatyn kezder - bal...
Únsizdik shýlaityn zaman bar,
Bal-shyryn - ýlaityn taǵam bar.
Temirdi ietin gúlder bar,
Shógirdi súietin taban bar...
Ózender shóldeidi qatalap,
Janarlar kúledi botalap...
Ishime syimaidy sonda óleń
Mańdaiǵa syimaidy mahabbat...
11.III.2016
***
Tózimiń jetse ol kúidi jazba, shyda,
Mahabbat – yntyqtyq-aý azǵa, sirá...
Kópirden sekirmedik nege sonda?
Ókirgen ózenderge – kóz jasyna.
Súimegen shaqta súrseń ómir ońai,
Ómirden bólip alam seni qalai?
Qubyla jaqty umyttym, Qudai kesher,
Shuǵyla shashqan kezde meńiń arai!
Sóz artyq shyn ǵashyqqa, án-syńarǵa,
Kóz artyq, shyndap shyqqan tamshy barda!
Sóz kerek, kerek múmkin nan surarǵa,
Jo-jo-joq, tym dóreki – hal surarǵa...
Úndeme, únsiz ǵashyq sózine aýys,
Sózsiz súi, kózsiz unat, óziń alys.
Sóz artyq tynyshtyq ta – tyńshy syndy,
Biz únsiz turǵan shaqtyń ózi – daýys.
Qyz zaty kórmep edi bulai unap,
Sóz artyq shyn sezimge qudaiy haq.
Óleńim sózsiz jazǵan saǵan sumdyq,
Ánim de sózsiz aitqan shynaiyraq.
***
Bir sezim bolady baiqalmai jetetin,
Bir sezim bolady aita almai ótetin...
Qurlyqtar siiaqty silkinip kórmegen,
Muhittar siiaqty shaiqalmai ketetin...
Bir sezim bolady renjime, kek sońy,
Bir sezim bolady, baqytty etshi ony...
Qońyraý siiaqty belgisiz nómirden,
Sańyraý siiaqty estitin tek sony...
Bir sezim bolady unatyp kórmeitin,
Bir sezim bolady jubatyp kelmeitin...
Ólimge uqsaidy kúldirip alatyn,
Ómirge uqsaidy jylatyp jerleitin...
Bir sezim bolady taýsylyp bitetin,
Bir sezim bolady júikeńdi tútetin.
Bir saty siiaqty páterden shyqpaityn,
Bir sáki siiaqty aýlada kútetin...
09.III.2017
***
Qaralai bermeshi qaradai jii aqty,
Qashyǵym – jup-jýyq!
Biz nege júremiz balmuzdaq siiaqty,
Táp-tátti,
Sup-sýyq?
Kún jaily umytyp, aitamyz shyqsa Aidy,
Sheshendi múkis qyp.
Bizdiń kúi ne úshin kofege uqsaidy,
Ap-ashy,
Yp-ystyq?
Men jaýap bermesem sen qoiǵan talapqa,
Kinámdi tizimde.
Biz nege uqsaimyz men ishken sharapqa,
Sen jegen júzimge?
Kereǵar 2
Kóktemde quspen keldiń,
Shatyrdan jas bop tamdym.
Sharapty ishken menmin,
Sen nege mas bop qaldyń?
Kóktemde gúlmen keldiń,
Úzilip túsken ánmin.
Kúrshekti ilgen menmin,
Sen nege ishte qaldyń?
Kóktemde quspen keldiń,
Qyratta gúl bop óndim.
Kólikten túsken menmin,
Sen nege birge keldiń?
Kóktemde hatpen keldiń,
Qanaty, bul aq qustyń.
Tapansha. "At!" men berdim,
Sen nege qulap tústiń?
2016
Miras Asan 1987 jyly Qaraǵandy oblysy, Qarqaraly aýdany, Baqty aýylynda dúniege kelgen. Halyqaralyq «Shabyt» shyǵarmashyl jastar festivaliniń laýreaty. «Bekzat», «Sońǵy raýshan» kitaptarynyń avtory.
