Seisenbi kúni Minsk ortalyǵynda arnaiy jasaq sarbazdary prezident Aleksandr Lýkashenkoǵa qarsy naryzylyq sharasyn ótkizbek bolǵan stýdentterdi ustady.
Prezident sailaýynyń resmi qorytyndysymen kelispeitin stýdentter jańa oqý jyly bastalǵan kúni oppozitsiia úndeýimen mitingige shyqqan. Tańerteńnen beri stýdentter ýniversitetter aldynda piket ótkizip jatyr. Ondaǵan stýdent Minsk ortalyǵynda sherý jasamaq bolǵan, alaida arnaiy jasaq sarbazdary olardyń jolyn bógep, shara ótkizýine múmkindik bermedi. Shamamen on adam ustaldy. Qalǵandaryn militsiia kúshpen taratty.
Minskiniń taǵy bir bóliginde stýdentter sherýi ótip jatyr. Azattyqtyń Belarýs qyzmeti tikelei efirden habar taratty.
Oqý orny aldynda birneshe stýdenttiń ustalǵany da habarlandy.
Osyǵan deiin Nexta telegram-arnasynda 1 qyrkúiekte jalpyulttyq ereýilge shyǵý týraly urandar kóterilgen bolatyn. Seisenbi kúni tańerteń BelAZ, Minsk podshipnik shyǵaratyn zaýyt pen ózge de kásiporyndarda jumysshylardyń bir bóligi ereýilge shyqqan. 1 qyrkúiekte keibir dámhanalar, dúkender men shaǵyn biznes nysandary jumys isteýdi toqtatatynyn habarlaǵan.
Belarýste narazylyq aktsiiasynyń jalǵasyp jatqanyna 24 kún boldy. Narazylar 9 tamyzda ótken prezident sailaýynyń qorytyndysy burmalandy dep sanaidy. Sodan beri kún saiyn myńdaǵan adam kóshege shyǵyp, narazylyq bildirip keledi. Alǵashqy kúnderi qaýipsizdik kúshteri demonstranttardy kúshpen taratyp, myńdaǵan adamdy ustaǵan. Júzdegen adam jaraqattandy. Birneshe adam qaza boldy.
Batys elderi biliktiń beibit halyqqa kúsh qoldanýyn synady. Keibir Eýroodaq elderi Belarýstiń birqatar sheneýnikterine sanktsiia saldy.
Belarýs prezidenti Aleksandr Lýkashenko Batysty eldiń ishki isine aralasty dep aiyptady. Reseidiń syrtqy ister ministri Sergei Lavrov ta seisenbi kúni Belarýstegi jaǵdai týraly aityp, Lýkashenkonyń aitqandarymen is júzinde kelisti.
"Bizdiń litvalyq áriptester talap qoiamyz dep tym shekten shyǵyp ketti. Olar Tihanovskaia hanymmen demokratiialyq ádis dep aitýǵa kelmeitin amaldar arqyly jumys isteidi dep aitýǵa barlyq negiz bar" dedi ol. Degenmen Lavrovtyń neni meńzegeni belgisiz. Buǵan deiin Belarýs oppozitsiiasy Lýkashenkoǵa narazylyq Reseige narazylyqty bildirmeidi dep málimdegen.
