Belarýs soty 23 mamyrda Ryanair ushaǵy Minskige tótenshe jaǵdaida qonǵannan keiin ustalǵan Resei azamaty Sofiia Sapegany eki aiǵa qamady.
Advokat Aleksandr Filanovich RBK agenttigine bergen suhbatynda seisenbi kúni tergeýshilerdiń Sofiia Sapegadan jaýap alǵanyn aitqan. Ol birneshe qylmystyq is boiynsha kúdikke ilingen. Qazir Belarýs ulttyq qaýipsizdik komitetiniń tergeý izoliatorynda qamaýda otyr.
25 mamyrda belarýstiń bilikshil "Jeltye slivy" arnasy Sofiia Sapeganyń videosyn jariialady. Onda qyz bala ózin tanystyryp, Roman Protasevichpen birge ushqanyn aitady, ishki ister organ qyzmetkerleriniń jeke aqparatyn jariialaityn telegram arnanyń redaktory bolǵanyn moiyndaidy.
- Buǵan deiin Ryanair reisinde Sapegadan basqa taǵy reseilik tórt azamattyń bolǵany jaily habar taraǵan. Alaida Resei SIM bul aqparatty rastamaǵan.
- 23 mamyrda Ryanair áýe kompaniiasynyń Grekiiadan Litvaǵa bara jatqan FR497 reisi kenetten baǵytyn ózgertip, Minskige qonýǵa májbúr bolǵan. Belarýs biligi arnaiy áskeri ushaq jiberip, reiste bomba bolýy múmkin dep ushaqty Minskige burǵan. Borttan bomba tabylmady, esesine Belarýs politsiiasy ushaqta bolǵan oppozitsiialyq jýrnalist, NEXTA Live Telegram arnasynyń negizin qalaýshylardyń biri, jýrnalist Roman Protasevichti tutqyndady. Ushaqty burýǵa Belarýs rejiminiń basynda otyrǵan Aleksandr Lýkashenkonyń ózi buiryq bergen.
- Roman Protasevich sońǵy kezderi "Belarýs golovnogo mozga" telegram-arnasyn júrgizip kelgen. Ol – Aleksandr Lýkashenkoǵa qarsy jappai narazalyq sherýlerinen habar taratqan NEXTA telegram-arnasynyń negizin qalaýshylardyń biri. Belarýs biligi bul arnany ekstremistik media dep sanaidy. Bilik Protasevichke halyqaralyq izdeý jariialap, ony "terrorister tizimine" qosqan. Ol birneshe jyl buryn qaýipsizdik maqsatynda Belarýsten ketip qalǵan.
- 24 mamyrda Belarýs telearnalary Roman Protasevichtiń videomálimdemesin jariialady. Videoda jýrnalist jaǵdaiy qalypty ekenin, Minskidegi tergeý izoliatorynda otyrǵanyn jáne ózine qyzmetkerlerdiń "dórekilik" kórsetpegenin aitady. Bloger sonymen birge jappai tártipsizdik isi boiynsha jaýap berip jatqanyn atap ótken.
- Videomálimdemeni kórgen jýrnalistiń anasy Natalia Protasevich ulynyń jaǵdaiyna alańdap, oǵan qysym kórsetken bolýy múmkin dep sanaidy.
- Batys elderi Minskiden jýrnalisti bosatýdy talap etip jatyr. 24 mamyrda Briýsseldegi kezdesýde Eýropa odaǵyna múshe 27 eldiń jetekshileri Belarýs biligine taǵy da sanktsiia salýǵa kelisti. Jiynda EO liderleri odaqqa múshe elderdiń áýe kompaniialaryn Belarýs tóbesinen ushpaýǵa, Belarýstiń Belavia áýe kompaniiasyn Eýropaǵa kirgizbeýge shaqyrǵan. Belavia 30 qazanǵa deiin Ulybritaniia men Frantsiiaǵa reis ushyrmaitynyn málimdedi.
