Eńbek jáne halyqty áleýmettik qorǵaý ministrligi "Tamara Dúisenova qazaq tilin bilmeidi" dep aiyptaǵan basylymdarǵa jaýap berdi, dep habarlaidy "Ult aqparat" vedomstvonyń baspasóz qyzmetine silteme jasap.
“Ranking.kz internet-portalynda, al keiinnen Qazaqstannyń birqatar basqa da BAQ-tarynda QR Eńbek jáne halyqty áleýmettik qorǵaý ministri Tamara Dúisenova memlekettik tildi bilmeidi degen shyndyqqa múldem janaspaityn aqparat taratyldy. Bul rette kórineý jalǵan aqparat taratý zań boiynsha jazalanatynyn nazaryńyzǵa salamyz.
QR Eńbek jáne halyqty áleýmettik qorǵaý ministrligi Tamara Dúisenovanyń ana tili qazaq tili ekenin habarlaidy. Ministr memlekettik tildi jetik meńgergen, QR Úkimeti men Parlamentinde únemi qazaqsha sóz sóileidi, BAQ-tarda suhbattar pen túsiniktemelerdi qos tilde qatar beredi.
QR Ákimshilik quqyq buzýshylyq týraly kodeksiniń 73-3-baby ekinshi bóligine sáikes buqaralyq aqparat quraldaryn paidalana otyryp jasalǵan jala jabý (iaǵni, basqa adamnyń ar-namysy men qadir-qasietine nuqsan keltiretin nemese onyń bedeline nuqsan keltiretin kórineý jalǵan málimetterdi taratý) 650 ailyq eseptik kórsetkishke deiin aiyppul salýǵa ne 25 táýlik merzimge ákimshilik qamaqqa alýǵa ákep soǵady" - delingen habarlamada.
Vedomstvo otandyq BAQ ókilderinen tekserilgen aqparatty jariialaýdy, al azamattardan feikterge nazar aýdarmaýdy jáne aqparatty tek resmi kózderden alýdy surady.
Esterińizge sala keteiik, osy jyldyń 3 qazanynda Ranking.kz internet-portalynda «Ministry-poligloty: 2 iz 19 ministrov RK ne vladeiýt gosýdarstvennym iazykom, 7 iz 19 – angliiskim» atty material jariialandy, onda QR Eńbek jáne halyqty áleýmettik qorǵaý ministri Tamara Dúisenovanyń ana tilin, iaǵni memlekettik tildi bilmeitini týraly jańsaq aqparat keltirilgen.
Keiinnen bul aqparat Qazaqstannyń birqatar BAQ-tarynda jariialanǵan bolatyn.
