Syrtqy ister ministriniń birinshi orynbasary Muhtar Tileýberdi vedomstvo Siriiaǵa ketken qazaqstandyqtardyń máselesin nazarda ustap otyrǵanyn aitty, dep habarlaidy Sputnik Qazaqstan tilshisi.
"Habar 24" telearnasynyń redaktsiiasyna kómek surap júgingen áieldiń aitýynsha, Qazaqstannyń jeti azamaty 16 balamen birge segiz ai boiy Siriiadan elge qaita almai otyr. Olar Siriiaǵa Oral, Aqtóbe, Almaty jáne Jezqazǵan qalalarynan barǵan. Aitýynsha, qazaqstandyqtar óte nashar jaǵdaida turady, al balalar bosqyndar lagerinde túrli dertke shaldyqqan.
Muhtar Tileýberdi Siriia men Iraktaǵy azamattardyń mekenjaiyn anyqtaý boiynsha jumys júrip jatqanyn málimdedi.
"Olardy elge qaitarý boiynsha da másele qaralyp jatyr. Bizdiń Iordaniiadaǵy elshiligimiz ben Livandaǵy bas konsýldyq azamattardy izdeýmen ainalysýda. Budan bólek biz sonda júrgen azamattardyń ata-analarymen de bailanystamyz", — dedi ol.
Aitýynsha, qaýipti aimaqtarǵa ketken otandastardy elge qaitarýmen tek SIM ǵana emes, arnaiy qyzmet, Qorǵanys, ishki ister ministrlikteri men tótenshe jaǵdai komiteti de ainalysyp jatyr. Azamattardy elge qaitarǵan jaǵdaida arnaiy ushaq bólinedi.
"Qazir Siriia men Irakta azamattarymyzdyń terroristik qyzmetke qatystylyǵy tekserilýde. Olardyń kinásiz ekendigi anyqtalǵannan keiin, Qazaqstan tarapyna beriledi. Keibir áielderdiń qasynda balalary bar. Olardy otanǵa qaitarý úshin ata-anasynyń balany alyp ketýge ruqsaty kerek. Al anasy nemese ákesi arnaiy tekseris aiaqtalǵanǵa deiin sol jaqta qala turady", —dedi Tileýberdi.
