Energetika ministrligi Petropavldyń jylý elektr stantsiiasyndaǵy kezekti apatqa qatysty málimdeme jasady.
Vedomstvo habarlaǵandai, 26 naýryzda saǵat 21:30-da JEO-2-de qolaisyz temperatýra (-13 S) áserinen, ashyq jylý kontýry saldarynan impýlsti tútiksheler qatqan.
"Tútikshelerdiń qatýyna 20 naýryzda murjanyń qulaýy jáne syrtqy temperatýranyń tómendeýinen tsehtyń qysymsyzdanýy sebep bolǵan. Bul úsh qazandyqtyń isten shyǵýyna alyp keldi", - dep habarlady ministrlikte.
Vedomstvo málimeti boiynsha, qazir tútiksheler jylytylyp, jylý elektr stantsiiasynda 3 qazandyq jumys istep tur, tórtinshi qazandyqty iske qosý bastaldy jáne jaqyn ýaqytta besinshi qazandyq agregaty jumysqa qosylmaq.
"Qazirgi ýaqytta jelidegi temperatýra 45 gradýs, kún sońyna deiin temperatýra rejimin qalpyna keltirý josparlanyp otyr", - dedi energetika ministrliginde.
Qala turǵyndary úidegi batareialar sýyp, jyly sý syldyrap aqqanyna shaǵymdanǵan. Jeksenbiniń tańynda jergilikti ákimdik qazir eki qazandyq pen eki týrbina jumys istep turǵanyn jáne jelilik sý temperatýrasy 43S/37S deńgeiinde ekenin málimdedi. "Sevkazenergo" AQ jóndeý-qalpyna keltirý jumystary júrgizilip jatqanyn habarlady.
Eske salsaq, 20 naýryzda Petropavlda ekinshi jylý elektr ortalyǵynyń murjasy opyrylyp qulady. Sonyń saldarynan birneshe qazandyqtyń jumysyn toqtatýǵa týra keldi. Úiindi astynan mashinist áieldiń máiiti tabyldy.
Tótenshe jaǵdaidan keiin JEO-2 direktory men bas injeneri qamaýǵa alyndy. Qylmystyq kodekstiń 254-baby ("Mindetterine adal qaramaý") boiynsha sotqa deiingi tergeý sharalary bastaldy.
Oblys ortalyǵyndaǵy JEO-2 alpysynshy jyldan beri jumys istep tur. 2021 jyldyń qarasha jáne jeltoqsanynda kásiporynda eki ret apat boldy. Sol kezde eki qazandyq isten shyǵyp, birneshe aýdan jaryqsyz qalǵan.
26 naýryzda saǵat 21:30-da Petropavldaǵy JEO-2 nysanynda taǵy apat boldy. Jelilik sý temperatýrasy Tselsii boiynsha 43-37 gradýsqa deiin tómendedi.
