Úkimettiń búgingi otyrysynda Jambyl oblysynyń ákimi Asqar Myrzaxmetov Aýyl sharýashylyǵy ministrliginiń "sany bar, sapasy joq kooperativter kóp" degen málimdemesimen kelispeitinin jetkizdi, dep xabarlaidy QazAqparat tilshisi.
"Jańa ministrliktiń baiandamasynda "sany bar, sapasy joq" degen pikir aityldy. Menińshe, bul jerde ondai pikirdi oilanyp aitqan durys siiaqty. Óitkeni kooperativterdi qurý ol dúkennen satyp alatyn bir zat emes. Aldymen onyń bárin qaǵaz júzinde rásimdeý kerek. Rásimdegennen keiin, ótinim beriledi. Ótinim berilgennen keiin, ol qondyrǵylardy daiyndaý úshin keminde úsh-tórt ai kerek", - dedi A.Myrzaxmetov.
Ákimniń aitýynsha, qarjylandyrý, kóbinese, ekinshi jartyjyldyqta bastalady. Sol sebepti jyldyń aiaǵyna deiin barlyq kooperativterdi texnikalyq jaǵynan tastúiin qylý múmkin emes.
"Ótken jyl - ol alǵashqy pilottyq jyl. Sondyqtan onyń barlyǵynyń sapasy joq dep aitý durys emes. Aldymen barlyq qajetti qondyrǵylardy alyp berý kerek", - dep atap kórsetti A.Myrzaxmetov.
Osy oraida Úkimet basshysy Baqytjan Saǵyntaev oblys ákimi aitqan máseleniń sheshimin Jambyl aimaǵynda barynsha kórsetýge keńes berdi.
"Asqar Isabekuly, ózińizdiń oiyńyzdy Jambyl oblysynyń baǵdarlamasy boiynsha úlken dárejede kórsetińiz, bárine sabaq bolsyn", - dedi B.Saǵyntaev.
Aita keteiik, búgin Aýyl sharýashylyǵy ministrligi iri jáne usaq kooperativterdi biriktirip, osy saladaǵy jumysty jańasha júrgizýdi usyndy. Atap ótilgendei, sapasyz kooperativter kóbeiip ketken. "Búginde 851 kooperativtiń ishinde tek 491-i ǵana qajetti texnikamen jabdyqtalyp, aǵymdaǵy jylda ónim óndirýge daiyn. Al 360 kooperativte tiisti qural-jabdyqtar bolmai shyqty. Ókinishke qarai, jaǵdaidy "sany bar, sapasy joq" dep aitýǵa týra keledi", - dedi vitse-ministr Arman Evniev.
