QR Oqý-aǵartý vitse-ministri Ǵani Beisembaev pedagogterge jazǵy eńbek demalysy men emdelý ótemaqysy qashan tolyq tólenetinin aitty, dep habarlaidy QazAqparat.
«Bul máseleniń týyndaýy aqshanyń joqtyǵyna bailanysty emes jáne júieli problema da emes. Negizinen jergilikti qarjyny bólgende ákimdikter jiti mán bermegendikten osyndai másele týyndap otyr. Iaǵni, ýaqytsha másele dep aitýǵa bolady. Aqsha bar, másele ministrliktiń jiti qadaǵalaýynda. Eń bastysy muǵalimder tiesili jalaqysyn alǵany kerek», - dedi ministrdiń orynbasary.
Onyń aitýynsha, ministrlik eńbekaqy qaryzy bar óńirlerdiń ákimdikterimen birge jazǵy eńbek demalysy men emdelý ótemaqysynyń qaryzyn tolyq óteýge arnalǵan keste qurǵan.
«Sol keste boiynsha, jýyq arada, iaǵni kelesi aptanyń basyna deiin bári tiesili aqshasyn alyp bitedi dep otyrmyz. Oblystardyń bizge bergen ýádesi sondai. Men soǵan súienip aityp otyrmyn. Tiesili tólemderdiń bárin jýyq arada tólep bitemiz degen ýádeleri bar. Kórip otyrmyz, ázirge ol ýádelerin oryndap jatyr.
Pedagogterdiń ailyǵy men eńbekaqysyn, jazdyq demalysqa bailanysty aqylaryn tóleý jergilikti atqarýshy organnyń enshisindegi dúnie. Biz oǵan qaramastan búkil aimaqtardaǵy pedagogterdiń ailyqtarynyń ýaqtyly tólenýin baqylaýda ustap otyrmyz», - dedi Ǵani Beisembaev.
Eske salsaq, keshe Májilis depýtaty Iýliia Kýchinskaia Oqý-aǵartý ministri Ashat Aimaǵambetovtiń atyna depýtattyq saýal joldap, muǵalimderdiń ailyǵyn keshiktermei tóleýdi suradǵan edi. Onyń aitýynsha, jazǵy eńbek damlysyna shyqqan muǵalimderdiń 30 mlrd teńge kóleminde eńbekaqysy tólenbegen.
