Foto: Getty Images Sport
QR Týrizm jáne sport ministrligi Qazaqstan fýtbol federatsiiasynan túsinikteme berýdi talap etti, dep habarlaidy Ult.kz.
"Kesheli beri áleýmettik jelilerde fýtboldan Qazaqstan ulttyq quramasynyń bas bapkeri Stanislav Cherchesovtiń qazaq tilin kemsitýge tyrysqany týraly beinematerial keńinen taralyp, qoǵam tarapynan narazylyq týǵyzdy. Ministrlik bul jaǵdaiǵa bei-jai qaramai, Qazaqstan fýtbol federatsiiasyna resmi hat joldady", - delingen ministrlik málimdemesinde.
Hatta memlekettik tildiń mártebesi Qazaqstan Respýblikasynyń Konstitýtsiiasy men "Til týraly" Zańyna sáikes joǵary turatyny jáne oǵan barlyq azamattyń qurmet kórsetýi kerektigi aitylǵan. Sonymen qatar federatsiiadan osy oqiǵaǵa túsinikteme berý jáne S.Cherchesovpen memlekettik tilge qurmet kórsetý týraly túsindirý jumystaryn júrgizý talap etilgen.
"Biz mundai jaǵdailardyń qaitalanbaýyn qamtamasyz etý úshin federatsiia tarapynan tiisti sharalar qoldanylýy kerek dep sanaimyz. Sondai-aq Qazaqstan fýtbol federatsiiasy Ministrlikke baǵynysty uiym emes ekenin, tiisinshe onyń ishki máselelerine aralasa almaitynyn, degenmen Qazaqstandaǵy sport saiasatyn qalyptastyryp, júrgizetin vedomstvo bolǵandyqtan, túsinikteme talap etýge quqyly ekenin qaperge salamyz.
Osy jazba arqyly elimizdegi ózge federatsiialardy da memlekettik rámizderge, ulttyq qundylyqtarǵa qurmetpen qaraýǵa jáne olarǵa qatysty orynsyz qaljyńnyń aldyn alýǵa shaqyramyz", - deidi ministrlik ókilderi.
Buǵan deiin Senat depýtaty Gennadii Shipovskih QHA múshesi retinde Stanislav Cherchesovtiń qazaq tilin frantsýz tilimen shatastyrǵan áreketine qatysty Sport ministri men Qazaqstan fýtbol federatsiiasyna úndeý joldaǵan edi.
