Biyl mektep túlekteri ulttyq biryńǵai testileýdi 2 ret tapsyra alady. Bul týraly búgin QR Bilim jáne ǵylym vitse-ministri Miras Dáýlenov aitty, dep habarlaidy "Ult aqparat".
«Naýryzdyń 10-y men sáýirdiń 10-y aralyǵynda UBT aqyly negizde ótedi. Oǵan úmitkerler bir ret qana qatysa alady. Al 15 sáýir men 30 maýsym aralyǵynda UBT tegin bolady. Bul rette úmitkerler UBT-ny eki ret tapsyrý múmkindigine ie. Olar bilim granttaryn bólýge qatysady. Sáýir-maýsym aralyǵyndaǵy UBT-ǵa biyl mektep bitiretin 120 myń túlektiń qatysatyndyǵy josparlanǵan», - dedi ol ministrliktiń apparat jinalysynda.
Onyń atap ótýinshe, elimizdiń óńirlerinde UBT ótkizý pýnkteriniń sany jetkilikti.
Biyl UBT-ny mektep bitirýshiler, ótken jyly orta bilim uiymdaryn bitirgender, kásibi-tehnikalyq orta bilim alǵandar, Qazaqstan azamaty emes tulǵalar, shetelderdegi bilim uiymyn bitirgender tapsyrady.
«Ótken jyly biz olarǵa UBT-ny pandemiiaǵa bailanysty qashyqtan ótkizgen edik. Sondyqtan olarda UBT-ny elektrondy formatta tapsyrý tájiribesi bar jáne bul olar úshin jańalyq emes», - dedi Miras Dáýlenov.
