Syrtqy ister ministrligi Qytaida esirtki kontrabandasy úshin ustalǵan Aqjarqyn Turlybaidy elge qaitarý máselesin túsindirdi.
Ministrdiń birinshi orynbasary Shahrat Nuryshevtiń aitýynsha, sottyń sońǵy sheshimi áli shyqqan joq. Onsyz Aqjarqyn Turlybaidy ekstraditsiialaýǵa suraý salý múmkin emes.
«Sottyń sońǵy otyrysy qyrkúiek aiynda bolǵan. Biraq sheshim áli shyqqan joq. Biz sony kútip otyrmyz. Sottyń sheshimi shyqqannan keiin ekstraditsiialaýǵa bolady. Tártip boiynsha onyń týǵan-týystary bas prokýratýraǵa Aqjarqyndy ekstraditsiialaý týraly ótinishhat joldaidy. Sonyń negizinde bas prokýratýra Qytaidaǵy kontr áriptesterge suraý salady. Olar óz kezeginde sottalǵan adamdy bere me, joq pa, ózderi sheshedi. Oń sheshim bolsa, ekstraditsiia jasalady» dedi Nuryshev Sputnik Qazaqstanǵa bergen suqbatynda.
Onyń sózine qaraǵanda, Aqjarqyn Turlybai elge qaitarylǵannan keiin onyń isin Qazaqstannyń soty qaraidy. Sebebi eki eldiń zańnamasy eki bólek jáne qylmys úshin beriletin jaza ártúrli.
«Iá, jazanyń merzimi ózgerýi múmkin. Sebebi Qazaqstan men Qytaidyń zańnamasy bir-birine uqsamaidy. Bir qylmys úshin ártúrli jaza beriledi. Sondyqtan bul jerde ol óz jazasyn Qazaqstannyń zańnamasy boiynsha óteýi tiis» dep atap kórsetti Nuryshev.
Qazaqstan azamaty Aqjarqyn Turlybai 2014 jyly naýryzda Gýanchjoý áýejaiynda ustalǵan bolatyn. Oǵan shekaradan 4,5 keli esirtkini alyp ótpek boldy degen aiyp taǵyldy. Ol kezde otandasymyz 20 jasta bolǵan edi. 2015 jyldyń maýsymynda Qytai soty ony ómir boiyna bas bostandyǵynan aiyrdy. Sotta Aqjarqyn sheteldik dosy aldap ketkenin aityp, kinásin moiyndaǵan joq.
2016 jyly sot sheshimi joiylyp, is qaita qaraýǵa jiberildi.Biyl 3 qyrkúiekte Qytaidyń Gýanchjoý qalalyq sotynda Aqjarqyn Turlybaidyń isi boiynsha otyrys ótti. Sot otyrysy 2 saǵattan astam ýaqyt boldy. Aqjarqyn Turlybai qytai tilinde jaýap berip otyrdy.
Al 9 qyrkúiekte otandasymyzdyń anasy Zýhra Seitimova Qazaqstan prezidentine kómek surap hat jazǵany habarlandy. Artynsha Qasym-Jomart Toqaev Qytaiǵa sapary kezinde Aqjarqyn Turlybaidyń máselesin kóterdi.
Qazaqstannyń Qytaidaǵy elshiliginiń málimetine súiensek, Turlybai qasyndaǵy sottalǵandarǵa aǵylshyn tilin úiretip júr.
Syrtqy ister ministrligi Sputnik Qazaqstan saýalyna bergen resmi jaýabynda Aqjarqyn Turlybai kórkem ádebiet oqitynyn aitty. Dene shynyqtyrýmen de ainalysady. Qytai tilin jaqsy meńgerip alǵan. Túzetý mekemesindegi jaǵdaiǵa qatysty shaǵymy joq eken.
Qazaqstannyń Qytaidaǵy elshiliginiń qyzmetkerleri Gýanchjoýdaǵy túrmege baryp, Turlybaidyń qal-jaǵdaiyn bilip turady. Buǵan qosa, aqshalai kómek kórsetip, suraǵan kitaptaryn taýyp beredi.
