Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov endi memlekettik qyzmettegi basshylar ózine baǵynyshty qyzmetkerler sybailas jemqorlyq qylmysyn jasaǵan jaǵdaida otstavkaǵa ketýge mindetti ekenin aitty, dep habarlaidy Sputnik Qazaqstan.
Ol "Qazaqstan Respýblikasynyń keibir zańnamalyq aktilerine memlekettik qyzmet jáne sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly" zańǵa engizilgen jańashyldyqty túsindirip berdi.
"Bul zańnyń qabyldanýy Qazaqstanda sybailas jemqorlyqqa qarsy kúrestiń jańa kezeńi bastalǵanyn bildiredi. Táýelsiz Qazaqstan tarihynda tuńǵysh ret basshylardyń qol astyndaǵy qyzmetkerleri úshin jaýapkershiligi zańnamalyq deńgeide bekitildi", - dedi ol ortalyq kommýnikatsiialar qyzmetinde ótken brifingte.
Otstavkaǵa ketýge mindetti
Onyń aitýynsha, saiasi memlekettik qyzmetshiler – ministrler men olardyń orynbasarlary, oblystardyń, Nur-Sultan, Almaty, Shymkent qalalary men oblys ákimderi men olardyń orynbasarlary, aýdan ákimderi tikelei baǵynyshty qyzmetkerleri sybailas jemqorlyq jasasa, mindetti túrde otstavkaǵa shyǵýy qajet.
"Zańnyń jańa redaktsiiasyna sáikes, birinshi basshy onyń tikelei baǵynyshty qyzmetkerine qatysty sottyń aiyptaý úkimi kúshine engennen soń, 10 kúntizbelik kún ishinde nemese aqtalmaityn negizder boiynsha qylmystyq is toqtatylǵannan keiin otstavkaǵa ketýge mindetti", - dedi sybailas jemqorlyqqa qarsy qyzmet tóraǵasynyń birinshi orynbasary.
Qandai qyzmetkerler baǵynyshty bolyp sanalady?
Oljas Bektenov zań aiasynda qandai qyzmetkerler tikelei baǵynyshty retinde qarastyrylatynyn túsindirdi.
"Ortalyq memlekettik organnyń basshysy (ministr) úshin bul onyń orynbasarlary, jaýapty hatshy nemese apparat basshysy, aimaqtyq bólimshelerdiń basshylary; Oblys, respýblikalyq mańyzy bar qalalar, astana ákimi úshin onyń orynbasarlary, apparat basshysy, aýdan (oblystyq mańyzy bar qalanyń) ákimi; Ortalyq memlekettik organ basshysynyń orynbasary (vitse-ministr) úshin onyń qaramaǵyndaǵy bólimshe nemese táýelsiz qurylymdyq bólimshe basshysy sybailas jemqorlyq qylmysyn jasaǵan kezde qyzmetinen ketedi", - dedi basshy.
Onyń aitýynsha, oblys ákiminiń orynbasary jergilikti biýdjetten qarjylandyrylatyn atqarýshy organdardyń basshylaryna jaýap beredi. Al aýdan ákimi óziniń orynbasarlaryna, apparat basshysyna, jetekshilik etetin aýdandyq atqarýshy organdardyń basshylaryna, aýyl, kent, aýyldyq okrýgterdiń ákimderine jaýapty.
Sybailas jemqorlyqtyń aldyn alýǵa mindetteledi
Vedomstvo tóraǵasynyń birinshi orynbasary bul zań boiynsha basshylar baǵynyshty qyzmetkerlerine sybailas jemqorlyq qylmysyn jasatpaýǵa, onyń aldyn alýǵa mindetti ekenin atap ótti. Ol bul mindet oryndalmaǵan jaǵdaida basshy tártiptik jaýapkershilikke tartylatynyn aitty.
"Zańnamaǵa ujymdaǵy sybailas jemqorlyqty boldyrmaý mindetin júieli túrde oryndamaityn basshylyqqa jaýapkershilik engizildi. Eger tikelei baǵynyshty adamdar sybailas jemqorlyq qylmys jasamaǵan bolsa da, memlekettik organda nemese belgili bir aimaqtyq bólimshede sybailas jemqorlyq deńgeii kúrt joǵarylasa, basshyny tártiptik jaýapkershilikke tartý máselesi qaralady", - dep atap ótti Oljas Bektenov.
Onyń pikirinshe, sybailas jemqorlyqqa qarsy is-qimyl agenttiginiń basty mindeti – basshylardy is júzinde óz ujymynda sybailas jemqorlyqtyń aldyn alýǵa jáne boldyrmaýǵa yqpal etý.
Aita keteiik, búgin Memleket basshysy Qasym-Jomart Toqaev "Qazaqstan Respýblikasynyń keibir zańnamalyq aktilerine memlekettik qyzmet jáne sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly" zańǵa qol qoidy.
Zań jobasy memlekettik qyzmetshilerdiń áleýmettik qorǵalýyn arttyrýǵa, konkýrstyq rásimderdi jetildirýge, memlekettik qyzmetshilerdiń jeke jaýapkershiligin joǵarylatýǵa, kadr tapshylyǵyn azaitýǵa yqpal etedi.
