Qazaqstan halqyna jáne Prezidentine Ulttyq bank tóraǵasy Daniiar Aqyshev, Joǵarǵy Sot keńesiniń tóraǵasy Anatolii Smolin, Bas prokýror Jaqyp Asanov, "Syrbar" syrtqy barlaý qyzmetiniń direktory Ǵabit Baijanov, sondai-aq Prezident Ákimshiliginiń basshylyq laýazymdaǵy birqatar tulǵalary, Úkimet músheleri, oblystardyń jáne Almaty qalasynyń ákimi saltanatty túrde ant berdi, - dep habarlaidy "Ult aqparat" Aqordaǵa silteme jasap.
Qazaqstan Prezidenti memlekettik qyzmetshilerge qoiylatyn talap arta túsetinin atap ótti.
"Biýdjet qarajatyn tiimsiz paidalaný jaǵdailary jii kezdesip jatady. Memlekettik qyzmetshiler tarapynan bolatyn quqyq buzý jaittary memlekettik qyzmettiń ǵana imidjine emes, jalpy memlekettik basqarý júiesine teris áserin tigizedi", - dedi Memleket basshysy.
Sondai-aq, Nursultan Nazarbaev jinalǵan memlekettik qyzmetshilerdiń bárine aldaǵy tsifrlyq dáýir talaby jańashyl sheshimderdi, olardy tiimdi iske asyra alatyn jetekshilerdi qajet etetinin aitty.
Qazaqstan Prezidenti el damýynyń jańa kezeńinde mańyzdy oryn alatyn óńirlik kásipkerlikti damytý máselesine toqtaldy.
"Bul jumysty atqarý ákimderge júktelgen. Olarǵa tiisti ókilettikter men múmkindikter berildi. Biz jurtty biznespen ainalysýǵa úiretýge tiispiz", - dedi Elbasy.
Memleket basshysy áleýmettik salanyń udaiy nazarda bolatynyn jetkizdi.
"Ekonomika men áleýmettik saladaǵy túbegeili ózgerister saiasi jańǵyrýmen qatar júredi. Aldaǵy ýaqytta bilik tarmaqtary arasyndaǵy ókilettikterdi qaita bólý Parlamenttiń, Úkimettiń jáne jergilikti memlekettik organdardyń rólin arttyratyn bolady. Sondyqtan keshiktirmei, múlde jańasha jumys júrgize bastaý qajet", - dedi Nursultan Nazarbaev.
Sońynda Elbasy eldiń basqarýshy korpýsy aldynda turǵan mindetterdiń aýqymdylyǵy men kúrdeliligin, ol saiasi memlekettik qyzmetshilerden joǵary jaýapkershilik talap etetin atap ótti.
"Sizder halyqtyń múddesine minsiz qyzmet etip, óz mindetterińizdi abyroimen atqarady dep senemin. Biz táýelsizdigimizdi nyǵaitý jolynda jáne Qazaqstannyń jarqyn bolashaǵy úshin qolymyzdan kelgenniń bárin jasaýǵa tiispiz", - dep túiindedi Qazaqstan Prezidenti.
.jpeg)