Qazaqstanda qarýmen jasalatyn qylmys eki esege qysqardy. Bul týraly búgin halyqpen eseptik kezdesý ótkizgen QR Ishki ister ministri Qalmuhanbet Qasymov aitty, dep habarlaidy QazAqparat tilshisi.
«Qarý joǵary qaýip kózi sanalady. Olar bizdiń azamattarymyzda túrli joldarmen qolǵa túsken. Bireýlerinde ruqsat bolmaǵan kezderden beri baiaǵydan bar, endi birinde týǵan-týystarynan qalǵan. Shetelge ketip bara jatyp tastap ketkender de kezdesedi. Qarý turǵannan keiin otbasylyq-turmystyq qarym-qatynasta da qoldanylady, keide balalar oinaidy. Bul qaiǵyly jaittarǵa sebep bolyp jatady. Sondyqtan 2012 jyly bizdiń azamattarymyzdyń qolyndaǵy qarýdy alý týraly sheshim qabyldandy», - dedi ol.
Onyń aitýynsha, zańsyz qarýdy aktsiia aiasynda tapsyrǵandar jaýapkershilikke tartylmaidy. Jumystar qolǵa alynǵan kezde el turǵyndarynan qarýlardy satyp alý úshin Úkimet shamamen 240 mln teńge bólgen. Birinshi jyly azamattar shamamen 8 myń qarý jaraq tapsyrdy.
«Oq-dáriler men jarylǵyshtardy tapsyrǵandar boldy. Tipti bir jerden taýyp alǵan granatany ótkizgender de kezdesti. Munyń barlyǵyn bizge ótkizdi, ótemaqy berdik. Bes jyldyń ishinde óte kóp qarý-jaraq qaitaryp aldyq. Olardyń arasynda týǵan-týystarynan qalǵan tarihi qarýlar da kezdesip, mýzeige tapsyrdyq. Nátije bar. Búgingi kúni qarýdyń qoldanylýymen jasalatyn qylmystar eki esege qysqardy. Muny óte jaqsy nátije dep esepteimin», - dedi Qasymov.
Máselen, ministrdiń dereginshe, qarý qoldaný arqyly 2013 jyly shamamen 650 qylmys tirkelse, ótken jyly ol 300-ge deiin azaiǵan.
«Degenmen, adamdarda áli de qarý bar. Sondyqtan biz aǵymdaǵy jyly da osy maqsatqa aqsha surap otyrmyz. Azamattarǵa qarýlaryńyz bolsa tapsyrýǵa taǵy da ótinish jasaǵym keledi. Eger ózimiz tabatyn bolsaq, onda qylmystyq jaýapkershilikke tartamyz. Aktsiia bar kezde qaitarýlaryńyzdy suraimyn», - dedi ol.
