قازاقستاندا قارۋمەن جاسالاتىن قىلمىس ەكٸ ەسەگە قىسقاردى. بۇل تۋرالى بٷگٸن حالىقپەن ەسەپتٸك كەزدەسۋ ٶتكٸزگەن قر ٸشكٸ ٸستەر مينيسترٸ قالمۇحانبەت قاسىموۆ ايتتى, دەپ حابارلايدى قازاقپارات تٸلشٸسٸ.
«قارۋ جوعارى قاۋٸپ كٶزٸ سانالادى. ولار بٸزدٸڭ ازاماتتارىمىزدا تٷرلٸ جولدارمەن قولعا تٷسكەن. بٸرەۋلەرٸندە رۇقسات بولماعان كەزدەردەن بەرٸ باياعىدان بار, ەندٸ بٸرٸندە تۋعان-تۋىستارىنان قالعان. شەتەلگە كەتٸپ بارا جاتىپ تاستاپ كەتكەندەر دە كەزدەسەدٸ. قارۋ تۇرعاننان كەيٸن وتباسىلىق-تۇرمىستىق قارىم-قاتىناستا دا قولدانىلادى, كەيدە بالالار وينايدى. بۇل قايعىلى جايتتارعا سەبەپ بولىپ جاتادى. سوندىقتان 2012 جىلى بٸزدٸڭ ازاماتتارىمىزدىڭ قولىنداعى قارۋدى الۋ تۋرالى شەشٸم قابىلداندى», - دەدٸ ول.
ونىڭ ايتۋىنشا, زاڭسىز قارۋدى اكتسييا اياسىندا تاپسىرعاندار جاۋاپكەرشٸلٸككە تارتىلمايدى. جۇمىستار قولعا الىنعان كەزدە ەل تۇرعىندارىنان قارۋلاردى ساتىپ الۋ ٷشٸن ٷكٸمەت شامامەن 240 ملن تەڭگە بٶلگەن. بٸرٸنشٸ جىلى ازاماتتار شامامەن 8 مىڭ قارۋ جاراق تاپسىردى.
«وق-دەرٸلەر مەن جارىلعىشتاردى تاپسىرعاندار بولدى. تٸپتٸ بٸر جەردەن تاۋىپ العان گراناتانى ٶتكٸزگەندەر دە كەزدەستٸ. مۇنىڭ بارلىعىن بٸزگە ٶتكٸزدٸ, ٶتەماقى بەردٸك. بەس جىلدىڭ ٸشٸندە ٶتە كٶپ قارۋ-جاراق قايتارىپ الدىق. ولاردىڭ اراسىندا تۋعان-تۋىستارىنان قالعان تاريحي قارۋلار دا كەزدەسٸپ, مۋزەيگە تاپسىردىق. نەتيجە بار. بٷگٸنگٸ كٷنٸ قارۋدىڭ قولدانىلۋىمەن جاسالاتىن قىلمىستار ەكٸ ەسەگە قىسقاردى. مۇنى ٶتە جاقسى نەتيجە دەپ ەسەپتەيمٸن», - دەدٸ قاسىموۆ.
مەسەلەن, مينيستردٸڭ دەرەگٸنشە, قارۋ قولدانۋ ارقىلى 2013 جىلى شامامەن 650 قىلمىس تٸركەلسە, ٶتكەن جىلى ول 300-گە دەيٸن ازايعان.
«دەگەنمەن, ادامداردا ەلٸ دە قارۋ بار. سوندىقتان بٸز اعىمداعى جىلى دا وسى ماقساتقا اقشا سۇراپ وتىرمىز. ازاماتتارعا قارۋلارىڭىز بولسا تاپسىرۋعا تاعى دا ٶتٸنٸش جاساعىم كەلەدٸ. ەگەر ٶزٸمٸز تاباتىن بولساق, وندا قىلمىستىق جاۋاپكەرشٸلٸككە تارتامىز. اكتسييا بار كەزدە قايتارۋلارىڭىزدى سۇرايمىن», - دەدٸ ول.
