Bir saǵat buryn qoǵam belsendisi Syrym Ábdirahmanov pen Bilim jáne ǵylym ministri Erlan Saǵadievtiń kezdesýi aiaqtaldy. Ábdirahmanovtyń aitýynsha, ministr jaqyn ýaqytta ziialy qaýym ókilderimen de kezdesýge daiyn.
— Bilim jáne ǵylym ministri Erlan Saǵadievten jańa ǵana shyqtym. Jasyratyny joq, Erekeńdi 10-15 jyldai bilemin. Birer sharalarda júzdesip, bilim júiesiniń damýy boiynsha biraz suxbattasqanbyz. Onyń ústinde 5 jyldan astam shetelde oqyp kelgen tájiribesi bar. Jalpy pisken azamat.
Qoǵamda mektepterde Álippeni, joǵary oqý oryndarynda Qazaq tili men Qazaq ádebieti kafedralaryn qysqartty, klassifikator mamandyqtarynan alynyp tastaldy degen aqparattty estisimen dúr silkinip, Ministrdi óz kózimmen kórip, sózin óz qulaǵymmen esteiin dep kezdesýge muryndyq boldym. Astanada bolǵasyn Dina Elgezek te qoldap, birge kezdestik. Jóndi áńgime boldy.
Bul aqparattyń jalǵan ekenin Ministr oiyndaǵysymen jetkizdi. Adamdardyń ótirik aitqanynan emes, jalpy túsindirý jumystary kem bolǵandyqtan ekenin alǵa tartty. Sondyqtan jaqyn arada ziialy qaýymmen kezdesýge daiyn ekenin jetkizdi.
1. "Álippe" eshqaida ketpeidi! Bir máselesi ǵana – ol birinshi synyptan emes, 1 qyrkúiekten bastap nóldik synyptan, iaǵni 6 jastan oqytylyp, bala birinshi synypqa árip úirenip barady. Bul úshin arnaiy komissiia qurylyp, Bekbolat Tileýxany bar azamattar jańa Álippeniń mátinin muqiiat qaraityn bolady. Komissiianyń músheligine ózimdi de shaqyrdy. Mysaly, meniń Dinmuxamedim biyl 6 jasqa tolyp, nóldik synypqa barmaqshy. Eger ulym Álippeni bir jyl erte tanyp jatsa, ózim riza bolar edim.
2. Jańa klassifikator mamandyqtary bekitildi degen - bos áńgime! Qazaqstan Bollon oqý júiesine engennen keiin bul másele 2009 jyldan beri kóterilip, áli de saraptalýda. Sondyqtan "bekitildi" degen aqparat shyndyqqa sai kelmeidi.
3. Joǵary oqý oryndarynda Qazaq tili men Qazaq ádebieti kafedralary jabyldy degen áńgime de shyndyqqa janaspaidy! Ministrdiń aitýy boiynsha kerisinshe damytpaqshy.
4. «Serpin» baǵdarlamasy jabylmaidy! Onyń ústine, ministrdiń aitýy boiynsha, biyl 500 grant taǵy da qosylady! Eger, buryn Qazaqstannyń Ońtústiginen Soltústigine tek bakalavr mamandyqtary men kolledjderge balalardy jibergen bolsa, biyldan bastap Qazaq tilinde sapaly bilim berý úshin «Serpin»-ge magistratýra men PhD doktorantýraǵa jastar jiberiletin bolady. Sondyqtan, «Serpin» baǵdarlamasynyń bolashaǵy zor.
5. Qoǵam qairatkerleriniń keiipimen belgisiz bireýlerdiń shyǵarǵan demotivatory boiynsha: ministr buny "provokatsiia" dep sanady. Erekeń El azamattaryn syilaitynyn jetkizdi.
Jalpy biraz áńgimelestik, degenmen qoǵamdy tolǵandyratyn máselerge toqtalǵandy jón kórdim. Kórdim. Estidim. Túigenim - osy, - deidi S.Ábdirahmanov óz jazbasynda.
