Foto:elements.envato.com
Almatydaǵy joǵary oqý oryndarynyń júzden asa stýdenti baspana máselesine bailanysty qiyn jaǵdaida qaldy. Bul týraly ǵylym jáne joǵary bilim ministri Saiasat Nurbek málimdedi. Ol máseleni qalai sheshý josparlanyp otyrǵanyn aitty, - dep habarlaidy Tengrinews.kz.
"Jataqhana máselesi bar, bul - bir kúnniń, bir jyldyń problemasy emes, ondaǵan jyl boiy qordalanyp keledi. Almatyda joǵary oqý oryndary shoǵyrlanǵan. 36 ýniversitet, barlyq stýdenttiń úshten biri, onyń 70 paiyzy - basqa qalalardan kelgender. Qazir Almatyda aýqymdy sharalar keshenin ótkizip jatyrmyz, jataqhanalar qurylysyna jáne akademiialyq infraqurylymdy keńeitýge jeke kapitaldy tartý maqsatynda investorlarmen kezdestik. Almatyda jeke shtab quryldy, qiyn jaǵdaiǵa tap bolǵan stýdentterdiń bárin ýaqytsha ornalastyramyz, baspana izdep jatyrmyz. Búginde qiyn jaǵdaida qalǵan 130 stýdentke kómek kórsetildi", - dedi Saiasat Nurbek Ortalyq kommýnikatsiialar qyzmetinde ótken brifingte.
Ol qazaqstandyq joǵary oqý oryndaryna qatań talaptar engizý týraly burynǵy málimdemesin túsindirip ótti.
"Eger ýniversitet jańa mamandyq ashqysy kelse, osy jańa mamandyq boiynsha stýdentterdi tartqysy kelse, tipti jańa ýniversitet ashqysy kelse de, jataqhanamen 100 paiyz qamtamasyz etýge óte qatań talaptar qoiylady. Ýniversitet 100 stýdentti jańa mamandyqqa tartqysy keledi delik. Mamandyǵy boiynsha ol 100 tósek-orynmen qamtamasyz etilýi kerek", - dep túsindirdi ministr.
Ol jekemenshik ýniversitetterdiń kampýstardy qala syrtyna kóshirý bastamasyn maquldady.
"Súleimen Demirel ýniversiteti siiaqty birneshe jeke JOO-lar kampýstaryn qala syrtyna kóshirip jatyr. Jańadan qurylǵan Jetisý óńirinde talapkerlerdiń bir bóligin Almatydan alystatý úshin ýniversitet infraqurylymyn damytý boiynsha úlken baǵdarlama da josparlanyp jatyr", - dedi Saiasat Nurbek.
