Búgin Májilistegi Úkimet saǵatynda QR Aýyl sharýashylyǵy ministri Erbol Qarashókeev veterinariia salasyndaǵy kemshilikterdi joiý qadamdaryn aitty, dep habarlaidy QazAqparat.
«Aýyldyq okrýgterdiń veterinariia mamandarynda mal ielerine ákimshilik áser etý boiynsha ókilettikterdiń bolmaýy olardy veterinariialyq normalardy buzǵany jáne oshaqta veterinariialyq is-sharalardy oryndamaǵany úshin jaýapkershilikke tartýdyń múmkin emestigine ákeldi. Osy maqsatta olar aýdan ortalyǵyndaǵy veterinariialyq inspektorlarǵa júginýge májbúr, bul veterinariialyq qaýipsizdikti qamtamasyz etý jónindegi veterinariialyq zańnama talaptaryn oryndaý protsesin keshiktiredi», - dedi Qarashókeev.
Onyń aitýynsha, jergilikti atqarýshy organdarda veterinariia mamandarynyń olarǵa tán emes fýnktsiialardy júzege asyrýy (qańǵybas itterdi aýlaý jáne aýyl sharýashylyǵy janýarlaryn qoldan uryqtandyrý) josparly is-sharalardy ýaqtyly júrgizý men tiimdiliginiń tómendeýine alyp keldi.
«Mal sharýashylyǵy ónimderine veterinariialyq-sanitariialyq saraptamany litsenziialaý kezinde múddeler qaqtyǵysynyń bolýy jáne pármendi baqylaýdyń bolmaýy sapasyz ónimderdi satýǵa jol berýge, sondai-aq veterinariialyq anyqtamalardy burmalaý faktilerine ákeldi», - dedi ministr.
Kórsetilgen problemalardy joiý úshin jergilikti atqarýshy organdardan Aýyl sharýashylyǵy ministrligi Veterinariialyq baqylaý jáne qadaǵalaý komitetine kelesi fýnktsiialardy berý usynylady:
- epizootiialyq oshaqtardy zerttep-qaraýdy júrgizý;
- epizootologiialyq zerttep-qaraý aktisin berý;
- aýmaqty aimaqtarǵa bólý týraly sheshim shyǵarý;
- karantindi jáne shekteý is-sharalaryn belgileý nemese alyp tastaý týraly sheshim qabyldaý;
- janýarlardan alynatyn ónim men shikizatqa veterinariialyq-sanitariialyq saraptamany litsenziialaý;
- jeke jáne zańdy tulǵalardan veterinariia salasyndaǵy kásipkerlik qyzmetti júzege asyrýdyń bastalǵany nemese toqtatylǵany týraly habarlamalar qabyldaý.
Jergilikti atqarýshy organdardyń veterinariia mamandarynyń tán emes myna fýnktsiialaryn alyp tastaý eskerilgen:
- aýyl sharýashylyǵy janýarlaryn qoldan uryqtandyrý boiynsha qyzmetter kórsetý;
- qańǵybas itter men mysyqtardy aýlaý jáne jansyzdandyrý.
«Joǵaryda atalǵan fýnktsiialardy berý aýmaqtyń epizootiialyq salaýattylyǵyn qamtamasyz etýge jáne veterinariialyq is-sharalardy júrgizýdiń jedeldigine, sondai-aq fýnktsiialardyń arajigin naqty ajyratýǵa oń áser etedi. Jergilikti atqarýshy organdardyń veterinariia uiymdarynyń veterinariialyq dárigerlerine nusqamalar berý jáne ákimshilik sharalar qoldaný boiynsha qosymsha ókilettikter berý janýarlar ielerine yqpal etý tetikteriniń bolýyna múmkindik beredi.
