"Turǵyn úi qurylys jinaq banki" AQ jekeshelendirilgende barlyq shart saqtalady. Ózgeretini – bank iesi "Báiterek" holdinginiń ornyna strategiialyq investor keledi. Bul týraly QR ulttyq energetika ministri Timýr Súleimenov málimdedi, dep habarlaidy Sputnik Qazaqstan tilshisi.
Búgin májilistegi úkimet saǵatynda halyq qalaýlylary "Turǵyn úi qurylys jinaq bankiniń" jekeshelendirilýine qatysty biraz máseleni qozǵady.
"TÚQJB jekeshelendirý josparynyń basymdyqqa ie tizimine qosylǵan. Atalǵan nysandy jekeshelendirýdiń negizgi maqsaty qandai? Jańa investor kelgende, jyldyq mólsherleme ne bolady? Bank memlekettik turǵyn úi baǵdarlamalaryna qatysýyn jalǵastyra ma?", — dep surady depýtat Petr Sharapaev ulttyq ekonomika ministri Timýr Súleimenovten.
Súleimenov salymshylar úshin barlyq jeńildikti sharttar saqtalatynyn atap ótti.
"Bul másele azamattar úshin óte mańyzdy. Sebebi qazaqstandyqtardyń deni osy bank arqyly baspanaly bolýǵa múmkindik alady. Sondyqtan atalǵan nysan jekeshelendirilgennen keiin, "Nurly jer" boiynsha qarastyrylǵan barlyq shart saqtalady. Iaǵni, salymshylarǵa 20 paiyz memlekettik syiaqy tólenedi, qalǵan sharttar da ózgerissiz qalady. Ózgeretin jalǵyz dúnie – bank iesi "Báiterek" holdinginiń ornyna strategiialyq investor keledi. Bizdiń aldymyzda turǵan mindetterdi júzege asyrýda onyń róli ózgermeidi. Jekeshelendirýden bizge qosymsha qarajat túsedi, sondai-aq jańa tehnologiialar, jańa korporativtik basqarý paida bolady dep úmittenemiz. Qarjy institýtynyń tiimdiligi arta túsedi degen oidamyz", — dedi ministr.
"Báiterek" ulttyq basqarýshy holdingi basqarma tóraǵasynyń orynbasary Ǵalymjan Tajiiaqov jekeshelendirilgennen keiin de bank memlekettiń baqylaýynda bolatynyn atap ótti.
"Keshendi josparǵa sáikes TÚQJB jekeshelendirý úlesi 49%-dan aspaidy. Baqylaý quqyǵy memlekette qalady. Bank, sizder bilesizder, turǵyn úi qurylys jinaǵy týraly zańmen retteledi, syiaqy boiynsha barlyq tólem, jeńildikter qalady. Biz jekeshelendirýden ne kútemiz? Biz bank jumysyna jańashyldyq ákeletin strategiialyq investordy kútemiz", — dedi Tajiiaqov.
Desek te, Súleimenov men Tajiiaqovtyń jaýaby depýtattardy qanaǵattandyrmady. Májilismen Omarhan Óksikbaev sheneýnikterdiń jaýaby túsiniksiz, naqty emes ekenin aitty.
"Strategiialyq investor ákelemiz dep túsindirip jatyr. Biz budan ne utamyz? Eger strategiialyq investor kelse, ol bankke quiǵan aqshasy úshin óziniń sharttaryn qoimai ma? Onyń óziniń erejeleri bolady. Biz oǵan neni ruqsat etemiz, ne tabamyz? Eshkim naqty jaýap bermeidi", — dep ashýlandy Óksikbaev.
"Birinshi, TÚQJB barlyq jeńildikti sharttary saqtalady. Ekinshisi – TÚQJB-nyń "Nurly jer" jáne múmkin "7-20-25" baǵdarlamalaryna qatysýy saqtalady jáne memorandýmda jazylady. Eger investor bizdiń qoiǵan talaptarymyzǵa kónbese, biz bankti satpaimyz. Úshinshi, jyldyq 20% syiaqy da sol qalpy qalady. Strategiialyq investordyń aldyna osyndai sharttar qoiamyz. Eger bizdiń sharttarymyzdy oryndai alatyn strategiialyq investor tabylsa, biz ony satamyz. Eger taba almasaq, odan ári qarastyramyz. Bul bizdiń halqymyz úshin úsh mańyzdy shart. Osy úsh shartty saqtamai biz bankti satpaimyz", — dep ýáde berdi ministr Súleimenov.
