Naqty suraqqa naqty jaýap bere almai Senat Tóraǵasy Qasym-Jomart Toqaevtan syn estigennen keiin Ulttyq ekonomika ministri Timýr Súleimenovtiń senatorlardyń aldyna alǵashqy kelýi. Esterińizde bolsa sol joly «Ministr múdirip qaldy» degen syn maqala berilip, ministrdiń daiyndyqsyz kelýi qoǵam ishinde biraz renish týǵyzǵan. Aqiqaty kerek, bul joly ministr Senatqa daiyndalyp kelipti. Qazaqshasy da jáp-jaqsy...
Degenmen, bul joly da ministr senatorlardyń syn sadaǵynan qutyla almady. Senattyń Ekonomikalyq saiasat, innovatsiialyq damý jáne kásipkerlik komitetiniń tóraǵasy A.Beisenbaev «Zań jobasyndaǵy ózgertýlerdi reiting kórsetkishine jáne kásipkerlikke qatysty dep aita almaimyz. Zań jobasynda kásipkerlikke múlde qatysy joq salalyq ózgertýler de oryn alǵan.Mysaly, erekshe qorǵalatyn tabiǵi aýmaqtarda, orman qoryn qorǵaýda, janýarlar dúniesin qorǵaýda qandai kásipkerlik bolýy múmkin? Ol jerde tek zań buzatyn brakonerler bolýy múmkin jáne aýmaqtaǵy memlekettik baqylaý men qadaǵalaýdy júrgizetin qyzmetkerler bolýy kerek» , - dep naqty mysalǵa júgine otyryp, kemshilikti ashyp kórsetti.
A.Beisenbaevtyń aitýynsha, zań jobalaryn daiyndaý barysynda, jaýapty ókiletti organmen qatar, basqa da salalyq ministrlikterdiń birge jumys atqarýy óte mańyzdy bolsa, ókinishke qarai, zań jobasymen jumys barysynda keibir ministrlik ókilderiniń ózderine qatysty ózgeristerdi bilmeitindigi anyqtalǵan jáne ony qabyldanǵannan keiingi saldary da zerttelmegen.
Senatorlar aldaǵy ýaqytta Úkimet reiting kórsetkishin jaqsartýǵa arnalǵan jumystardy júieli túrde júrgizip, zańdarǵa reitingke tikelei qatysty ózgertýler engizýi qajettigine kóńil aýdardy.
Senator Edil Mamytbekov aitqan derekter boiynsha, elimizde 20 kodeks qoldanysta, onyń 19-yna ózgerister men tolyqtyrýlar engizildi, sondai-aq 296 arnaýly zańnyń 266-syna ózgeris engizildi. «Bizdiń oiymyzsha, erejelerdiń kóptigi men zańnamaǵa udaiy ózgerister engizý ekonomikanyń tiimdi damýyna kedergi bolady», - degen syn aitty depýtat.
2018 jylǵa deiingi esep boiynsha Qazaqstan 190 el arasynda 36-shy orynǵa ie boldy. Jaqsy nátije siiaqty kórinedi.Sonymen qatar, Qazaqstan mynadai kórsetkishter boiynsha: «Salyq» 50-shi, «Qurylysqa ruqsat alý» 52-shi, «Elektr jelilerin qosý» 70-shi, «Nesiealý» 77-shi, «Halyqaralyq saýda» 123 oryndy ielenip, artta qalyp keledi.
Senator Dýlat Qusdaýletov zańnamaǵa ózgerister engizý men baqylaý-qadaǵalaý mindetin qysqartý sharalary esh ketken eńbekke balady. Senator bul sharalar ýaqytsha áser etetini týraly pikirin aityp, Úkimetti biznespen jumys strategiiasyn qaita qaraýǵa jáne odan da tiimdi jumys ádisterin izdestirýge shaqyrdy.
Degenmen, ministr senatorlardyń synyna tótep berdi. Sóitip, eskertýler men usynystardyń bári ózekti ekeni aitylyp, zań jobasyn ázirleýshiler olardy aldaǵy ýaqytta Úkimette ázirlenip jatqan jáne Májilistiń qaraýyna usynylǵan basqa zań jabalarynda,basqa normalyq-quqyqtyq aktilerdi ázirleý barysynda eskerýge kelisti.
Ministr senatorlardyń syn sadaǵyna ilikkenimen, bul joly Senattan kóńildirek shyqty. Keipinde bir senimdilik bar. Dál osy betinen taimasa, birer jylda esep-qisapty qazaqsha sýsha sapyratyn túri baiqalady. Kóz timesin. Óz tilin ógeisinip júrgenderdi osylai Toqaevsha silkip-silkip qoiǵannyń ziiany joq siiaqty ǵoi.
Ádilbek Qaba
