Foto: Gov.kz
Ǵylym jáne joǵary bilim ministri Saiasat Nurbek nelikten joǵary ball alǵan qazaqstandyq túlekterdiń grant uta almai qalǵanyn túsindirdi. Aitýynsha konkýrs ádil ótkizilgen.
Ministrdiń aitýynsha joǵary ball jinap, alaida joǵary oqý oryndaryna grant ala almaǵandar az grant bólingen mamandyqqa tapsyrǵan.
"90 baldan joǵary jinap, memlekettik bilim berý granttaryn uta almai qalǵan 10 607 talapkerdi muqiiat qarastyraiyq. Bul abitýrentter qandai mamandyqqa tapsyrǵan? Birinshi, eń kóp adam tapsyrǵan mamandyq – Dene shynyqtyrý pániniń muǵalimi. 3052 adam bul mamandyq boiynsha grant ala almady. Sebebi biz buǵan biyl 600 ǵana grant bólgenbiz. Taǵy bir 941 adam grant uta almai qalǵan mamandyq – Sán jáne dizain. Biyl bul salaǵa 205 grant bólingen, al tapsyrǵandar sany 1624 adam. Sýret óneri men syzý pánine daiyndyq mamandyǵyna 120 grant bólsek, 713 adam ótinish bildirgen. Joǵary ball alyp grant uta almai qalǵandardyń 70 paiyzy memleketke suranys týdyrmaityn mamandyqqa tapsyrǵan", – dedi ministr.
Ministr báriniń ádil, ashyq ótkenin alǵa tartty. Úkimet otyrysyndaǵy sózinde ol sý tasqynynan zardap shekken óńirlerdiń túlekterine 5 myńnan astam kvota bólingenin jetkizdi. Negizgi qarajat birinshi kezekte turǵyn úidi qalpyna keltirýge jumsalǵandyqtan odan artyq qosymsha granttar bolmaǵanyn alǵa tartty.
"Eger shynymen kómekteskimiz kelse, nege qosymsha qarajat bólmegenimizge syn aitylýda. Munda negizgi quraldar, eń aldymen, fizikalyq kómekke-turǵyn úidi qalpyna keltirýge jumsalǵanyn naqty túsiný kerek. Al talapkerler úshin eki arnaiy múmkindik berdik. Birinshisi UBT tapsyrý merzimin 25 shildege deiin uzarttyq, ekinshisi qańtar jáne naýryz ailarynyń synaq UBT sertifikattaryn paidalanýǵa múmkindik berdik.
Sý basqan óńirlerden 20 myńnan astam túlektiń jartysynan kóbi jalpy konkýrs boiynsha ótti. Zardap shekken oblystardan talapkerler úshin barlyǵy 5 112 grant bólindi. Bul aimaqtardy qoldaý úshin talapkerlerge daiyndalý jáne konkýrsqa qujattaryn tapsyrý úshin merzimi uzartyldy jáne konkýrsqa eń jaqsy UBT nátijesi bar sertifikatyn usyný múmkindigi berildi", – dep baiandady ol.
Ministr sonymen qatar osy múmkindikti 1120 adam paidalanyp, joǵary ballmen sertifikattar alyp eseptelgenin atap ótti.
"Taǵy da qaitalaimyn, bul tek bir kólemdegi shara boldy, tek osy jylǵa arnalǵan. Jalpy, kvotany, shamamen 5 myń adam paidalandy. Qalǵan 10 myń adam jalpy konkýrsqa qatysty. Sondyqtan bul shartty kvota boldy. Bizde qosymsha qarajat bólýge múmkindik bolmady", - dedi Saiasat Nurbek.
Eske salsaq, Ǵylym jáne joǵary bilim ministrligi 2024-2025 oqý jylyna arnalǵan bilim berý granttaryn bólýge qatysty egjei-tegjeili málimet bergen edi.
.jpg)
