"Muǵalim mártebesi" týraly zań jobasy tamyz aiyna qarai májilistiń qaraýyna engiziledi. Bul týraly búgin bilim jáne ǵylym ministri Kúlásh Shámshidinova málimdedi, dep habarlaidy Sputnik Qazaqstan tilshisi.
Ministrdiń aitýynsha, "Muǵalim mártebesi" týraly zań jobasy kóptegen eskertý jasalǵannan keiin qaita qaralǵan. 30 jyldyq eńbek ótili bar ustazdardyń zeinetke erte shyǵý múmkindigi qarastyrylǵan zań jobasy tamyzǵa qarai májiliske túsedi.
Shámshidinova muǵalimder azamattyq qyzmetkerler sanatyna jatatynyn, sondyqtan zeinet jasyna bailanysty másele barlyq organmen birlesip qaralatynyn atap ótti.
"Qazir biz zeinetaqy máselesin basqasha turǵydan kóterip jatyrmyz. Eger adam pedagogikalyq joǵary oqý ornyn támamdap, birden mektepke jumysqa ornalasyp, úzdiksiz eńbek etse, zeinetke shyqqan kezde, onyń oqý ornynda oqyǵan jyldary jalpy eńbek ótiline qosylady", - dedi Shámshidinova.
Buǵan deiin vitse-ministr Elmira Sýhanberdieva, otyz jyl eńbek ótili bar ustazdardyń zeinetke erte shyǵý múmkindigi týraly aityp edi.
Iaǵni joǵary oqý oryndarynda oqyǵan jyldar (4-5 jyl) eńbek ótili bolyp sanalatyndyqtan, muǵalimder bul áleýmettik kepildikke ie bolý úshin 26 jyl úzdiksiz muǵalim bolyp jumys istese jetkilikti. Muny qazaqstandyq salalyq bilim jáne ǵylym qyzmetkerleri kásipodaǵy usynǵan.
Máselen, 17 jasynda joǵary oqý ornyna tússeńiz, 21 jasynda ýniversitetti támamdaisyz. Osydan keiin 26 jyl úzdiksiz muǵalim bolyp jumys isteseńiz, 48 jasynda zeinetke shyǵýǵa quqyńyz bar.
Aita ketsek, "Pedagog mártebesi" týraly zań jobasy Qazaqstannyń tuńǵysh prezidenti – Elbasy Nursultan Nazarbaevtyń tapsyrmasymen ázirlengen bolatyn.
Osy jyldyń basynda Astanada ótken qoǵamdyq tyńdaý barysynda ministrlik zań jobasy aqpan aiynda depýtattar qaraýyna engizilip, maýsymda prezident qol qoiady dep josparlanyp otyrǵanyn habarlaǵan edi.
