Turǵyn úi baǵasyna keletin bolsaq, "Nurly jer" baǵdarlamasy boiynsha memleket tarapynan sharshy metr quny bekitilgen, dep eske saldy ministr.
"Ár qala, ár oblysqa ol anyqtalǵan, ony ózgertpeimiz. Qurylys salasy osy baǵdarlamaǵa qatysamyn degenderge baǵany kótergenimizdi qalaidy. Memleket baǵany kóteredi, biraq bul baspanany bireý satyp alýy kerek. Al ony bizdiń halyq satyp alady, biraq qymbatyraq. Sondyqtan bul jerde múddeler tepe-teńdigin saqtaý qajet", - dep túsindirdi ol.
Qaiyrbek Óskenbaev qurylys salasynyń mańyzdylyǵyn, turǵyndardyń múddesin eskerý qajettigin aitty.
"Qurylys salasy shyǵaratyn ónim halyqqa qoljetimdi bolýy kerek. Osy teńgerimdi saqtaýymyz kerek. Qurylys qunynyń qymbattaýyna keletin bolsaq, bul tetik zańnamada naqty kórsetilgen. Eger iske asyrylyp jatqan joba qunynyń ósýi 10 paiyzdan assa, onda ázirleýshi ákimshige habarlasýǵa quqyly. Ákimshi ne túzetýler engizip, qunyn arttyrady, ne kelispeidi. Bul rette oryndalǵan jumys kólemine eseptelip, burynǵy baǵa boiynsha konkýrs jariialanady", - dep túsindirdi vedomstvo basshysy.
Ol byltyr baǵanyń ósýine 220-ǵa jýyq joba saraptamaǵa barǵanyn eske saldy. Ministrdiń aitýynsha, olar saraptamadan ótip, baǵanyń kóterilgenin rastap, jergilikti atqarýshy organdar olarmen kelisimge qol qoiǵan.
Eske salaiyq, Ulttyq statistika biýrosynyń málimeti boiynsha, bir jyl ishinde - 2021 jyldyń naýryzynan 2022 jyldyń naýryzyna deiin - qaitalama naryqtaǵy páterler baǵasy - 27,7 paiyzǵa, jańa turǵyn úi baǵasy - 20,3 paiyzǵa, jalǵa alý 22,5 paiyzǵa ósken.
Foto: elements.envato.com
