Qazaqstannyń ádilet ministri Marat Beketaev moldovalyq biznesmenniń shaǵymy boiynsha Qazaqstannyń Qashaǵan jobasyndaǵy aktsiialaryn buǵattaý respýblikanyń bul jobadan kóretin paidasyna «áser etpeitinin» málimdedi. Bul týraly ol májiliste ótken úkimet saǵatynan soń jýrnalister saýalyna jaýabynda aitty, dep habarlaidy "Ult aqparat" Azattyqqa silteme jasap.
Ministrdiń pikirinshe, «Qashaǵan protsesinde» qoldanylatyn model boiynsha, Qazaqstan jobadan divident túrinde emes, salyq jáne munai satýdan túsetin kiris túrinde paida kóredi.
«Qazir aktsiiany buǵaýlaý týraly ǵana áńgime bolyp otyr. Bul - Qazaqstan aktsioner retinde sheshim qabyldai almaidy degen sóz emes. Ol bul aktsiialardy sata almaidy. Biraq, meniń bilýimshe, Qazaqstannyń bul aktsiialardy satý jospary joq. Qazir Qazaqstan úshin Qashaǵandaǵy úleske tónip turǵan qaýip joq», - dedi ministr.
Moldovalyq kásipker Anatol Stati ótken aptada eger Qazaqstan biligi 500 million dollar ótemaqyny tólemese Qashaǵan munai kenishiniń 5,2 milliard dollardy quraityn úlesin satýdy talap etetinin málimdegen.
Anatol men Gabriel Statiler jáne Ascom Group S.A. men Terra Raf Trans Traiding Ltd. atty taǵy eki kompaniia Qazaqstan úkimetin halyqaralyq sotqa berip, jeńip shyqqan. Olar Qazaqstan úkimeti ózderin shyǵynǵa ushyratty degen aryz bergen.
Sot Astanany 500 million dollar ótemaqy tóleýge mindettegen. Sot sheshiminen keiin New York Mellon (BK.N) banki Qazaqstannyń Ulttyq qoryna tiesili 22 milliard AQSh dollary kólemindegi aktivin buǵattaǵan.
Astana 500 million dollardy óteýden bas tartyp, AQSh-tyń federaldy sotyna shaǵymdanǵan.
Marat Beketaevtyń pikirinshe, aktivterdi aldyn ala buǵattaý - Qazaqstan ol aktivterden aiyrylyp qaldy degen sóz emes. «Bul qarjynyń jaiy kelesi sot protsesterinde sheshiledi jáne oǵan deiin áli uzaq ýaqyt bar» dedi Beketaev.
