قازاقستاننىڭ ەدٸلەت مينيسترٸ مارات بەكەتاەۆ مولدوۆالىق بيزنەسمەننٸڭ شاعىمى بويىنشا قازاقستاننىڭ قاشاعان جوباسىنداعى اكتسييالارىن بۇعاتتاۋ رەسپۋبليكانىڭ بۇل جوبادان كٶرەتٸن پايداسىنا «ەسەر ەتپەيتٸنٸن» مەلٸمدەدٸ. بۇل تۋرالى ول مەجٸلٸستە ٶتكەن ٷكٸمەت ساعاتىنان سوڭ جۋرناليستەر ساۋالىنا جاۋابىندا ايتتى, دەپ حابارلايدى "ۇلت اقپارات" ازاتتىققا سٸلتەمە جاساپ.
مينيستردٸڭ پٸكٸرٸنشە, «قاشاعان پروتسەسٸندە» قولدانىلاتىن مودەل بويىنشا, قازاقستان جوبادان ديۆيدەنت تٷرٸندە ەمەس, سالىق جەنە مۇناي ساتۋدان تٷسەتٸن كٸرٸس تٷرٸندە پايدا كٶرەدٸ.
«قازٸر اكتسييانى بۇعاۋلاۋ تۋرالى عانا ەڭگٸمە بولىپ وتىر. بۇل - قازاقستان اكتسيونەر رەتٸندە شەشٸم قابىلداي المايدى دەگەن سٶز ەمەس. ول بۇل اكتسييالاردى ساتا المايدى. بٸراق, مەنٸڭ بٸلۋٸمشە, قازاقستاننىڭ بۇل اكتسييالاردى ساتۋ جوسپارى جوق. قازٸر قازاقستان ٷشٸن قاشاعانداعى ٷلەسكە تٶنٸپ تۇرعان قاۋٸپ جوق», - دەدٸ مينيستر.
مولدوۆالىق كەسٸپكەر اناتول ستاتي ٶتكەن اپتادا ەگەر قازاقستان بيلٸگٸ 500 ميلليون دوللار ٶتەماقىنى تٶلەمەسە قاشاعان مۇناي كەنٸشٸنٸڭ 5,2 ميلليارد دوللاردى قۇرايتىن ٷلەسٸن ساتۋدى تالاپ ەتەتٸنٸن مەلٸمدەگەن.
اناتول مەن گابريەل ستاتيلەر جەنە Ascom Group S.A. مەن Terra Raf Trans Traiding Ltd. اتتى تاعى ەكٸ كومپانييا قازاقستان ٷكٸمەتٸن حالىقارالىق سوتقا بەرٸپ, جەڭٸپ شىققان. ولار قازاقستان ٷكٸمەتٸ ٶزدەرٸن شىعىنعا ۇشىراتتى دەگەن ارىز بەرگەن.
سوت استانانى 500 ميلليون دوللار ٶتەماقى تٶلەۋگە مٸندەتتەگەن. سوت شەشٸمٸنەن كەيٸن New York Mellon (BK.N) بانكٸ قازاقستاننىڭ ۇلتتىق قورىنا تيەسٸلٸ 22 ميلليارد اقش دوللارى كٶلەمٸندەگٸ اكتيۆٸن بۇعاتتاعان.
استانا 500 ميلليون دوللاردى ٶتەۋدەن باس تارتىپ, اقش-تىڭ فەدەرالدى سوتىنا شاعىمدانعان.
مارات بەكەتاەۆتىڭ پٸكٸرٸنشە, اكتيۆتەردٸ الدىن الا بۇعاتتاۋ - قازاقستان ول اكتيۆتەردەن ايىرىلىپ قالدى دەگەن سٶز ەمەس. «بۇل قارجىنىڭ جايى كەلەسٸ سوت پروتسەستەرٸندە شەشٸلەدٸ جەنە وعان دەيٸن ەلٸ ۇزاق ۋاقىت بار» دەدٸ بەكەتاەۆ.
