Qarjy ministri Erulan Jamaýbaev qarjy piramidalarynyń úsh ereksheligin atap, halyqty saq bolýǵa shaqyrdy, dep habarlaidy QazAqparat.
«Keibir piǵyldy adamdar basqa azamattardyń ómirlik qiyn kezeńin, halyqtyń qarjylyq saýatsyzdyǵyn paidalanyp, qarjy piramidalaryn qurady. Olardyń maqsaty – halyqtyń qarajatyn qaltaǵa basý. Mundai zańsyz uiymdardyń jolyn kesý jumystaryn Ekonomikalyq tergeý qyzmeti men IIM júrgizedi. Biyldyń ózinde Ekonomikalyq tergeý qyzmeti bul baǵytta 21 qylmystyq is qozǵaǵan. Sonymen birge psevdolotoreia máselesi de bar. Mundai ispen ainalysqan adamdar Almatyda anyqtalǵan bolatyn. Avtokólik oinatyp, artynsha senip qalǵan azamattardyń qarajatyn jymqyrǵan», - dedi Erulan Jamaýbaev halyq onlain esep berýden keiin OKQ-da uiymdastyrylǵan baspasóz máslihatynda.
Ministrdiń aitýynsha, qarjy piramidasyna qatysty Almatydaǵy is boiynsha 200 mln teńge shyǵyn keltirilgen. Aryzdanýshylardyń sany 2 myńnan asyp ketken. Qazir ol is boiynsha eki adam qylmystyq iske tartylýda.
«Mundai qylmystardyń aldyn alý úshin qandai jumystardy qolǵa alyp jatyrmyz? Eń birinshi kezekte, BAQ arqyly túsindirý jumystaryn júrgizemiz. Azamattardy saq bolýǵa shaqyramyz. Áleýmettik jelilerge monitoring jasaimyz. Sonymen birge bizdiń qarjylyq barlaý qyzmeti ekinshi deńgeili bankterge qarjy piramidalarynyń tipologiiasyn joldaidy», - dedi ol.
Erulan Jamaýbaev qarjy piramidalardyń birinshi qatysýshylary kiriske kenelgenimen, odan keiingi tartylǵandary opyq jeitinin jetkizdi.
«Qarjy piramidalarynyń bir belgisi – uiymdastyrýshylar bank depozitterinen kóp tabysqa keneletińizge ýáde beredi. Ekinshiden, kiriske qandai jaǵdaida bolmasyn keneletinińizge sendiredi. Úshinshiden, mundai uiymdar qarjylyq jaǵynan ashyq bolmaidy. Sonymen qatar olar jarnama úshin áleýmettik jelini erekshe paidalanady. Mundai belgilerdi sezip, kórip qalsańyz, saq bolǵanyńyz jón», - dedi ol.
