Sońǵy úsh jylda alys shetelden kelgen migranttardyń kópshiligi Qytai men Túrkiia azamattary bolyp otyr. Bul týraly májilistegi úkimet saǵatynda QR Ishki ister ministri Qalmuhanbet Qasymov aitty, dep habarlaidy Sputnik Qazaqstan tilshisi.
"Elimizdegi kóshi-qon protsesi óte aýqymdy. Bolashaqta ol tek arta túsedi. Sońǵy úsh jylda resmi statistika boiynsha bizdiń elimizge 5 million 600 myńnan astam sheteldik azamat kelgen. Olardyń toqsan paiyzdan astamy TMD elderiniń azamattary, negizinen Ózbekstan, Resei, Qyrǵyzstannan kelgender", — dep baiandady Qasymov májiliste ótip jatqan otyrysta.
Sondai-aq, ministrdiń aitýynsha, alys shetelden keletin migranttardyń qatary da kóbeiip otyr.
"Osy ýaqytta olardyń sany 620 myń adamǵa deiin jetti. Olardyń kóbi Qytai jáne Túrkiia azamattary", — dedi ol.
Qasymov zańsyz kóshi-qonmen kúresý ministrliktiń aldynda turǵan basty mindet ekenin atap ótti.
"Sebebi bul elimizdegi qoǵamdyq tártip úshin qaýipti faktor. Óitkeni, migratsiia aǵymy esepti biznes, adam saýdasy, ekstremizm jáne terrorizmmen bailanysty bolǵan kezder az emes. Bul salada baqylaý men retteýdi tiimdi uiymdastyrmasaq, elimizdiń áleýmettik-ekonomikalyq damýyna ziian kelýi múmkin", — dedi ministr.
