Energetika ministri Bolat Aqsholaqov qazaqstandyqtardy dizel otynyna qatysty jaǵdaiǵa bailanysty dúrbeleń týdyrmaýǵa shaqyrdy, - dep habarlaidy Tengrinews.kz agenttigi.
"Jalpy, búginde elimizde janar-jaǵarmai qory men óndirisi jetkilikti. Tranzittik kólikterdiń kóp bolýy maýsymdyq qubylys ekenin eskersek, bul qashanda osylai bolǵan. Sondai-aq, aýyl sharýashylyǵy taýaryn óndirýshiler úshin aýqymdy jumystar bastaldy, dizel otyny birinshi kezekte aýyl sharýashylyǵy taýar óndirýshileri men janar-jaǵarmai quiý stantsiialaryna jetkiziledi. Áleýmettik jelilerde kólikter jai ǵana baǵa yńǵaiyna qarai janarmai quiyp áketip jatqany túsirilgen videolar tarap jatyr", - dedi Aqsholaqov.
Onyń aitýynsha, kórshiles elderde dizel otynynyń baǵasy litrine 420-450 teńge. Armeniiada litriniń baǵasy 700 teńgeden joǵary bolsa, Qazaqstanda dizel otyny litrine 230-250 teńge sheginde satylady.
"Árine, mundai jaǵdaida ruqsat etilmegen aǵynǵa, ásirese dizel otynyna óte qatań baqylaý ornatý qajet. Janar-jaǵarmaidyń basqa túrlerine, AI-92, 95 markaly benzin boiynsha disproportsiia saqtalǵanymen, bul jumys tapshylyqtyń aldyn alý maqsatynda arnaiy komissiia aiasynda júrgizilip jatyr, bul máseleler qaralady", - dedi ol.
Ministrdiń aitýynsha, dizel otynynyń maýsymdyq tutynýy shildeden qyrkúiekke deiin eń joǵary deńgeige jetedi.
"Sondyqtan qazir osy komissiia aiasynda QTJ-daǵy áriptestermen, barlyq munai óńdeý zaýytymen birlese otyryp, kúnde, keide tipti kúnine birneshe ret jumys atqaryp jatyrmyz. Bul máseleni sheshý úshin tsisterna sanyn kóbeitý maqsatynda únemi onlain bailanysta bolamyz", - dedi Bolat Aqsholaqov.
Energetika ministrligi basshysy sońǵy eki kúnde dizel otynynyń jóneltilimi aitarlyqtai artqanyn, jyljymaly quram artyq kólemde jetkizilgenin aitty.
"Búginde alys-jaqyn aimaqtardyń bári jol júrý ýaqytyn esepke ala otyryp, 3 kúnnen 10 kúnge deiin jetetin janarmaimen qamtamasyz etilgen. Bul jerde eshqandai problema joq, barlyǵyn orynsyz dúrbeleń týǵyzbaýǵa shaqyrar edim. Elimizde janarmai óndiriledi, zaýyttar jumys istep tur, qosymsha qorlar qalyptasty. Joǵaryda aitqanymdai, tamyzdyń aiaǵyna deiin 288 myń tonna dizel otyny bolady, bul – paidalaný rezervteri. Óitkeni ai saiyn artyq jarty millionǵa jýyq ónim shyǵarylady.
Qor bitedi, janarmai taýsylady dep aitýǵa kelmeidi, olai emes. Bul tehnikalyq til, bul rezervter dál osyndai tapshylyqtyń aldyn alý turǵysynan jasalǵan. Zaýyttarda kútpegen toqyraý bolǵan jaǵdaida nemese jóneltý múmkindigine bailanysty eki aptadan bir aiǵa deiin qajettilik ornyn jabatyn qorlar qalyptasady", - dep qosty ol.
Ministr elimizde dizel otyndy paidalanýdy shekteý týraly buiryq óz nátijesin beredi dep esepteidi.
Aqsholaqovtyń aitýynsha, logistikalyq máseleler sheshilip jatyr.
"Sondyqtan men osynyń bárin dúrliktirmeýge shaqyramyn, elimizde janar-jaǵarmai bar, zaýyttar jumys istep tur, elde munai jetkilikti mólsherde óndirilip jatyr. Bizge qazir logistikalyq jelilerdi ońtailandyrý, ruqsat etilmegen aǵyndy azaitý kerek. Logistika máselesi birneshe kúnniń isi. Meniń oiymsha, bári bir qalypqa keledi", - dep túiindedi ministr.
