Ulttyq ekonomika ministri Rýslan Dálenov qol astyndaǵy qyzmetkeri Aslanbek Jaqypovqa qatysty sot úkimi kúshine engennen keiin otstavkaǵa ketýge daiyn ekenin aitty, dep habarlaidy Sputnik Qazaqstan tilshisi.
"Sot úkimi kúshine engende, otstavkaǵa ketýge ótinish beremin. Bul durys praktika. Bul birinshi basshynyń moraldyq jaýapkershiligi. Onyń kinási qanshalyqty ekenin joǵary turǵan basshylyq anyqtaidy", - dedi Dálenov senat kýlýarynda.
Buǵan deiin Qazaqstan prezidenti Qasym-Jomart Toqaev qaramaǵyndaǵy qyzmetkerleri jemqorlyq jasasa, basshylar otstavkaǵa ketýi kerek ekenin málimdegen edi.
Aita ketsek, ulttyq ekonomika ministrligi kásipkerlikti damytý departamentiniń direktory Aslanbek Jaqypovqa biyl sáýir aiynda 500 myń teńge para aldy degen aiyp taǵyldy.
Keiinirek sybailas jemqorlyqqa qarsy is-qimyl ulttyq biýrosy habarlaǵandai, ulttyq ekonomika ministrliginiń birqatar laýazymdy tulǵasyna qatysty sotqa deiingi tergeý bastalǵan. Jaqypovtyń isi alaiaqtyq babymen almastyryldy. 29 mamyr kúni Esil aýdandyq soty sheneýnikti kináli dep tanyp, úsh jylǵa bas bostandyǵynan aiyrǵan bolatyn.
