Ulttyq ekonomika ministri Rýslan Dálenov Salyq kodeksine ózgerister men tolyqtyrýlardy engizýdi kózdeitin zań jobasy boiynsha senatorlar aldynda baiandama jasady, dep habarlaidy QazAqparat.
Rýslan Dálenovtyń aitýynsha bul qujat investitsiia tartýdy yntalandyrýǵa, biznes ortany damytyp, salyqtyq ákimshilendirýdi jaqsartýǵa baǵyttalǵan.
«Salyq elementterin ózgertpei jeke tulǵalardyń múlik jáne jer salyqtaryn biriktirý usynylady. Eki salyq biryńǵai tólemmen tólenedi. Bul rette kóp páterli turǵyn úilerdiń ieleri úshin jer salyǵyn alyp tastaý usynylady. Sondai-aq, salyq tóleýshilerge qolaily bolý maqsatynda kólik salyǵyn tóleý merzimin osy jyldyń 31 jeltoqsanynan kelesi jyldyń 1 sáýirine aýystyrý usynylady», - dedi Rýslan Dálenov Parlament Senatynyń otyrysynda.
Sondai-aq, Rýslan Dálenov investitsiialyq salyqtyq nesieni engizý usynylyp otyrǵanyn jetkizdi.
«Nesie korporativtik tabys salyǵy jáne múlik salyǵy boiynsha
3 jylǵa paiyzsyz beriletin bolady, biraq sharttar oryndalmaǵan jaǵdaida ósimpul esepteledi. Maqtany qaita óńdeýge, ashytqy, konditerlik ónimder, qant qyzylshasynan qantty óndirýge eseptelgen qosylǵan qun salyǵynyń somasyn 70%-ke azaitý boiynsha normany qoldaný usynylyp otyr. Bul aýyl sharýashylyǵy ónimderin qaita óńdeýdi, otandyq taýar óndirýshilerdiń óndiris kólemin ulǵaitýdy yntalandyrady. Eksport kezinde qosylǵan qun salyǵyn qaitarý rásimin ońailatý maqsatynda otandyq óndirýshiler úshin qosylǵan qun salyǵyn jeńildetilgen túrde qaitarý quqyǵyn berý usynylady: iaǵni tekserýsiz – 50%, tekserýden keiin – 50%. Kólik quraldary men aýyl sharýashylyǵy tehnikasynyń komponentterin óndirý úshin qosylǵan qun salyǵy boiynsha jeńildikti qoldaný usynylady. Bul otandyq avtokólikterdegi qazaqstandyq qamtý úlesin arttyrady», - dedi ol.
