QR Densaýlyq saqtaý ministri Eljan Birtanov Almaty oblysynda meningitten adamnyń kóz jumýy oqiǵasyna pikir bildirdi, dep habarlaidy QazAqparat tilshisi.
Ministrdiń sózine qaraǵanda, Densaýlyq saqtaý ministrliginiń buiryǵyna sáikes, aýyr jaǵdaidaǵy naýqastar eń jaqynda ornalasqan meditsinalyq uiymǵa jetkizilýi tiis.
«Balaǵa qatysty oqiǵada jaqyn jerdegi Talǵar aýrýhanasyna jetkizý talpynysy boldy. Alaida sábidiń anasy ózi Almatyǵa baǵyt alyp, sol jerden jedel járdem shaqyrtty. Osy oraida qansha ýaqyt joǵalǵandyǵy aiqyn kórinip tur. Al onyń týysqanyna qatysty oqiǵaǵa toqtalsaq, atalǵan áieldiń sózi boiynsha, naýqasty Talǵardan Qaskeleńge jetkizbek bolǵan. Osy jaǵdai boiynsha biz tekserý júrgizemiz», - dedi Eljan Birtanov.
Bul rette E. Birtanov meningitten adamdardyń ólimi boiynsha árbir oqiǵaǵa saraptama júrgiziletinin atap ótti.
«Eger de zańbuzýshylyqtar bolsa, quqyq qorǵaý organdary da tiisti sharalardy atqarady. Sonymen birge Almaty qalasy prokýratýrasy qoldanystaǵy standarttardyń oryndalýyna qatysty tekserýdi bastady. Sondyqtan da tergeý sharalary taiaýda ǵana bastalǵandyqtan, naqty nátijelerdi qazir aita almaimyn», - dep túidi vedomstvo basshysy.
Esterińizge sala keteiik, Almaty oblysynda 19 jastaǵy qyz meningokkok infektsiiasynan kóz jumdy. Al onyń aldynda Almatyda 5 jasar balanyń meningitten ómiri qiyldy. Bala aýrýdyń birden asqynatyn túrine shaldyqqan. Budan buryn habarlanǵandai, ministr 2018 jyly Qazaqstanda meningitten 12 adam kóz jumǵanyn aitty.
